xoves, 22 de outubro de 2020

Pitusiña celebra o Día da Biblioteca no Concello de Pontecesures

Pitusiña é unha nena arrichada que sinte o galego, pensa, fala e xoga en galego. "Fala ben, así non se di..." Está farta de que sempre lle digan cousas que non entende e decide facer unha viaxe no tempo pola nosa historia onde descubrirá personaxes moi interesantes que lle farán comprender moitos porqués. Unha viaxe á que vos convida, queredes acompañala? Espectáculo de monicreques e actriz.

A cita de Pitusiña co Concello de Pontecesures, pertencente á comarca de Caldas, terá lugar na Biblioteca Municipal do Concello de Pontecesures, será o venres 23 de outubro ás 12:00 h. e está dirxido ao alumnado do CPI de Pontecesures, onde celebraremos o Día da Biblioteca.

luns, 19 de outubro de 2020

Celebramos o Día das Escritoras na Biblioteca Ánxel Casal de Compostela con "Palabra de Muller"

Celebramos o Día das Escritoras na Biblioteca Pública de Santiago Ánxel Casal, con "Palabra de Muller", recital onde persoas representativas da cultura e sociedade galega prestarán a súa voz á obra das escritoras homenaxeadas este ano no Día das Escritoras, contribuíndo a visibilizar e difundir o seu legado cultural, destacar o valor das súas obras, recordar as dificultades ás que se tiveron que enfrontar e poñer en valor o esforzo cotiá das mulleres.  A actividade está dirixida ao público adulto e coordinada por Ana Hermida, de Lisístrata Asociación en colaboración coa Biblioteca Pública de Santiago Ánxel Casal.

Este día é unha iniciativa da Biblioteca Nacional de España (BNE), a Federación Española de Mulleres Directivas, Executivas, Profesionais e Empresarias (FEDEPE) e a Asociación Clásicas e Modernas (CyM).

Leremos textos de Anisia Miranda, Blanca Varela, Sor Juana Inés de la Cruz, Mercé Rodoreda, Enriqueta Otero, Idea Vilariño, Rosalía de Castro, Luísa Villalta, Josefina Carabias, Luz Pozo, Filomena Dato, Concepción Arenal, Ana María Matute, Xohana Torres, Emilia Pardo Bazán, Dulce María Loynaz, Circe Maia, Hildegart Carballeira, Luisa Carnés, Errose Bustintza, Mariví Villaverde, Vitorina Durán, Ida Vitale, Carmen Baroja y Nessi, Gloria Fuertes, Elena Fortún, Pura Vázquez, Concha Méndez, Teresa de Jesús.

Será o luns 19 de outubro ás 19:30 h no salón de actos da Biblioteca, o aforo será limitado e o acto desenvolverase según o protocolo Covid.

martes, 18 de agosto de 2020

A Voz de Galicia faise eco do Premio de Oratoria "Filomena Dato"

Expresamos o noso agradecemento a Xesús Fraga e ao xornal La Voz de Galicia por facerse eco das nosas actividades, entre elas o Premio de Oratoria Filomena Dato, o primeiro que leva o nome da poeta das Mariñas, que tivo o seu acto de entrega o pasado 26 de xullo no Concello de Arteixo.

martes, 4 de agosto de 2020

O feminismo e a oratoria déronse cita en Arteixo no acto de entrega do I Premio de Oratoria Filomena Dato

O sábado 26 de xullo, aniversario do nacemento de Filomena, tivo lugar a entrega do I Premio de Oratoria Filomena Dato, o primeiro que leva o nome da autora máis premiada do século XIX. O Covid non puido coa forza das persoas que participaron no concurso, aínda nos tempos do confinamento, que puxeron todo o seu talento para ofrecernos uns traballos moi logrados e unha exposición dos mesmos que premiou o xurado e encantou ao público asistente. O temática elixida este ano pola organización era a "sororidade" e foi maravilloso escoitar como defendían a súa creación xuntando idioma galego e feminismo.

O acto estivo dirixido por Ana Hermida, presidenta de Lisístrata e no que estivo presente a concelleira de Cultura de Arteixo Dna. Ana María Bello Vázquez en representación do organismo arteixán, concello elixido pola organización para esta e vindeiras edicións, por ser onde radica a Asociación Cultural Lisístrata.

Despois de expoñer os seus traballos e recibir os correspondentes premios posaron coa satisfacción de saberse correspondidos co aplauso do público que quedou admirado coa súa oratoria.

Deixamos adianto da próxima reportaxe fotográfica coas persoas premiadas, de esquerda a dereita: Xabier Alexandre Almeida Rodríguez, do CPI José García García de Mende, Ourense (Cat. poesía), Irene González Calvo, do Ies Salvador de Madariaga da Coruña (Cat. oratoria) e Diego Parada Burés, do centro educativo Liceo La Paz, da Coruña (Cat. oratoria).

luns, 27 de xullo de 2020

Estivemos coas nosas "Feministorias" na Biblioteca Ánxel Casal de Compostela

O meu oficio de dicir é marabilloso, co paso dos anos sigo a sorprenderme en cada sesión. Esa mañá de sábado estaba un grupo de nenas na entrada agardando a que comezase, convideinas a pasar e dixéronme que eran amigas e viñan celebrar o aniversario dunha delas, daquela prendeuse unha luz nos meus ollos e sorriu o meu corazón, elixiran vir escoitar historias sobre o feminismo á biblioteca e pasar alí unha mañá de verán... e a min pareceume fermosísimo.

Sentaron diante, eu quedei preto querendo interactuar con elas, foi daquela cando preguntaron e expuxeron o moito que sabían de feminismo... foi unha mañá moi especial. O certo é que a Biblioteca Ánxel Casal é un lugar de encontro cultural máxico e xa noutras ocasión teño vivido algo semellante. Quedou demostrado que o feminismo pode ser divertido e que interesa coñecer a historia que non está nos libros de texto, a das nosas avoas e bisavoas que ergueron a voz e loitaron para cambiar o mundo. Aquí me vedes tentando aclarar as súas dúbidas e sobre todo... aprendendo dese público tan especial. Grazas por tanto como recibo.

venres, 24 de xullo de 2020

Acto de entrega do I Premio de Oratoria “Filomena Dato”

O pasado ano 2019 a Asociación Cultural Lisístrata convocaba o I PREMIO DE ORATORIA “FILOMENA DATO” para o alumnado dos diferentes ciclos do Ensino Obrigatorio, coa intención de promover o Idioma Galego e o Feminismo, ademais de render homenaxe a Filomena, un dos escasos referentes do feminismo do S. XIX e segunda escritora, despois de Rosalía, que publicaría un libro en galego nese século.

Este premio, o primeiro que leva o nome da “poeta das Mariñas” e que nesta primeira edición ten como tema a sororidade, terá o seu acto de entrega o domingo 26 de xullo ás 12:00 h. no Anfiteatro do Concello de Arteixo. Será un acto axustado ao protocolo Covid que consistirá nunha breve presentación, entrega de premios as persoas gañadoras, que expoñerán o seu traballo ante o público e como colofón a obra de Filomena soará na voz de Ana Hermida.

mércores, 22 de xullo de 2020

Pitusiña visita o Concello de Boimorto

Pitusiña é unha nena arrichada que sinte o galego, pensa, fala e xoga en galego. "Fala ben, así non se di..." Está farta de que sempre lle digan cousas que non entende e decide facer unha viaxe no tempo pola nosa historia onde descubrirá personaxes moi interesantes que lle farán comprender moitos porqués. Unha viaxe á que vos convida, queredes acompañala? Espectáculo de monicreques e actriz.

A cita de Pitusiña co público infantil da Comarca de Arzúa será o venres 24 de xullo ás 11:00 h., no CPI Armando Cotarelo Valledor do Concello de Boimorto.

venres, 3 de abril de 2020

Mantense aberto o prazo de presentación do I Premio de Oratoria "Filomena Dato"

Debido á EXCEPCIONALIDADE que estamos a vivir, mantemos aberto o prazo de presentación e pedimos ás familias a súa implicación para que nenas e menos poidan participar desde as súas casas coas súas gravacións. O prazo remata o xoves 30 de abril ás 14:00 h.

Convócase o I PREMIO DE ORATORIA “FILOMENA DATO” para alumnado dos diferentes ciclos do Ensino Obrigatorio e para centros públicos ou privados de Galicia e do exterior, coa intención de promover a expresividade e a expresión –poética, narrativa e discurso– do Idioma Galego e o Feminismo, ademáis de render homenaxe á “poeta das Mariñas”, un dos escasos referentes da literatura feminina e feminista do S. XIX e a segunda escritora, despois de Rosalía, que publicaría un libro en galego nese século. O tema deste ano é a "Sororidade".  

A inscrición farase no correo electrónico filomena.dato.muruais@gmail.com e deberá estar entregada a gravación, sempre mellor -de planos- en corpo enteiro, correspondente ao tema indicado, cunha duración máxima de 5 minutos, así como o traballo por escrito e a ficha do anexo, debidamente cuberta, que se pode descargar na páxina da organización convocante http://lisistrata-asociacion.blogspot.com/p/premio-filomena-dato.htmlO deseño e ilustración é obra do artista gráfico: Iván del Río.

martes, 31 de marzo de 2020

“Contadas na súa voz” homenaxe a Helena Villar Janeiro na Bibliotea Ánxel Casal de Compostela

Rematamos o mes de marzo lembrando a merecida e sentida homenaxe que lle fixemos a Helena Villar Janeiro na Biblioteca Pública de Santiago Ánxel Casal. Helena foi pioneira na literatura infantil en galego, a súa numerosa obra está traducida a outras linguas, sendo unha figura destacada da cultura galega, tanto pola súa dedicación á literatura como ao ensino.

Fixemos un repaso pola súa vida e repasamos a súa ampla obra, da que levamos unha mostra representativa, a continuación contamos algunhas das súas marabillosas historias que fascinan ao público infantil, tamén cantamos coa súa música e recitamos os seus poemas, eses xoguetes poéticos que leron todas e cada unha das persoas que estaban no salón de actos, foi fermoso escoitar a obra de Helena e Xesús Rábade Paredes recitada polo público adulto e infantil e ver tantas mans erguidas para ler as notas musicais que escribiu hai anos para nenas e nenos, alí estaban lendo no pentagrama e entoando.

Cando todo rematou e xa estaba eu recollendo volveu un pai para preguntarme cal era ese libro de música, polo visto andaba á procura dalgo así, así que llo deixei, foi ao mostrador da biblioteca e alí atopou esa xoia, veu devolvermo cun sorriso de satisfacción, atopara para a súa filla xusto o que el quería.

domingo, 8 de marzo de 2020

"Feministorias", unha cita co feminismo

Hai xa anos que levamos a cabo este e outros proxectos semellantes, só pretendemos concienciar no feminismo en bibliotecas, colexios institutos, teatros... O público (infantil, adolescente e adulto) coñecerá dun xeito divertido e ameno a historia que non está nos libros de texto, a das nosas avoas e bisavoas que ergueron a voz e loitaron para cambiar o mundo. Achegaremos referentes moi coidados, curiosidades, xogos… e repasaremos os logros e a evolución do feminismo ata os nosos días. Porque o feminismo tamén pode ser divertido.

xoves, 27 de febreiro de 2020

Conmemoramos o 8M en Carballo con “A historia en Feminino”

O Concello de Carballo, capital da comarca de Bergantiños, recibirá a visita de Ana Hermida para conmemorar o Día Internacional da Muller e contar "A historia en Feminino" nas Bibliotecas de Carballo, concretamente na Biblioteca Rego da Balsa, e facer un achegamento ao público infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, deportistas, escritoras, músicas… todas teñen cabida nesta historia en feminino. 

A cita coas mulleres borradas da historia, será o martes 03 de marzo ás 18:00 h., na Biblioteca Rego da Balsa, dentro do seu programa Xornadas Guerrilleiras.

mércores, 26 de febreiro de 2020

“Ningún lazo a suxeita” homenaxe a Filomena Dato no seu aniversario

Mentres os versos de Filomena soaban na voz de Ana Hermida co recital “Ningún lazo a suxeita”, o vento das Mariñas levaba a súa obra á veciñanza nesta homenaxe á “poeta das Mariñas”, título que lle outorgou o seu amigo Pérez Lugín. A escritora máis premiada do século XIX e académica correspondente da Real Academia Galega, chegaba ao corazóns das mulleres e homes que descubrían a obra da súa veciña ilustre. 

Levamos anos visibilizando a Filomena para reparar o seu inxusto esquecemento, achegando a súa obra, investigando e facendo actividades para darlle o lugar que lle corresponde. Xa no ano 2019 creamos o Premio de Oratoria Filomena Dato (primeiro premio que leva o nome da autora), para promover a expresividade e a expresión –poética, narrativa e discurso– do Idioma Galego e o Feminismo. En pouco tempo teremos novidades relacionadas con Filomena Dato.

sábado, 22 de febreiro de 2020

Acto central do Día de Rosalía no Concello de Arteixo

Despois de dúas semana de actividades dirixidas ao público escolar de Arteixo, Ana Hermida fará unha dramatización da obra da Nai das nosas letras con “Tecín soia a miña tea” e dará lectura ao Manifesto da AELG, que este ano foi redactado por Daniel Asorey. As persoas usuarias do centro tamén renderán homenaxe á padronesa universal dando lectura á obra Rosaliana. O acto central terá lugar na Residencia de Maiores do Concello, pertencente ao Consorcio Galego de Igualdade e Benestar da Consellería de Política Social.

A cita con Rosalía, neste emotivo acto, será o luns 24 de febreiro ás 11:00 h. na Residencia de Maiores de Arteixo.

xoves, 20 de febreiro de 2020

Arteixo conmemora o Día de Rosalía con "Tecín soia a miña tea"

Ana Hermida fará unha dramatización da obra da Nai das nosas letras con “Tecín soia a miña tea”, poemas, teatro, e algunha canción para honrar a nai da nosa terra no seu aniversario, unha muller interpretando a outra muller, a Rosalía feminista, divertida, defensora da súa terra. Tamén dará lectura ao Manifesto da AELG, que este ano foi redactado por Daniel Asorey. Este acto central terá lugar na Residencia de Maiores do Concello de Arteixo, pertencente ao Consorcio Galego de Igualdade e Benestar da Consellería de Política Social, onde as persoas usuarias do centro renderán homenaxe á padronesa universal dando lectura á obra Rosaliana. 

Será o luns 24 de febreiro ás 11:00 h. no Residencia de Maiores de Arteixo.

luns, 17 de febreiro de 2020

Rosalía de Castro visita a Biblioteca Ánxel Casal para celebrar o seu día con "Sabéndote, Rosalía"

Coa inocencia propia da infancia, unha Rosalía aínda nena, irá debullando a súa vida entre versos, cancións e soños. Quen mellor que Rosalía para facelo? Moito se ten escrito da nosa poeta, pero aínda non está todo dito. É este un achegamento ao mundo infantil da Nai das nosas letras, a Rosalía defensora da muller, da súa terra, unha Rosalía reivindicativa, divertida… Vida e obra contada en primeira persoa ao xeito de teatro infantil.

A cita cos contos será o sábado 22 de febreiro, no salón de actos da Biblioteca Pública de Santiago de Compostela, ás 12:00 h. con entrada é libre e gratuíta ata completar aforamento.

sábado, 8 de febreiro de 2020

Arteixo achega a figura de Rosalía ao alumnado do Ies Manuel Murguía con "Tecín soia a miña tea

Rosalía de Castro, na voz de Ana Hermida, estará co alumnado do Ies Manuel Murguía. Faremos un repaso pola súa biografía e pola súa obra, haberá representación teatral, dramatización da súa obra e participación do alumnado, que terá ocasión de poñer voz á nosa Poeta nacional e daremos lectura ao Manifesto da Aelg redactado este ano por Daniel Asorey. A actividade está organizada pola Concellería de Cultura a través da Rede de Bibliotecas do Concello de Arteixo.

Serán dous días de encontro, 21 e 27 de febreiro, cunha Rosalía loitadora, feminista, comprometida e dona dunha obra de inmensa valía. A cita terá lugar na Biblioteca Central de Arteixo “Henrique Rabuñal” ás 11:00 h.

sábado, 1 de febreiro de 2020

O Ceip de Galán de Oseiro, achega a figura de Rosalía ao seu alumnado con "Tecín soia a miña tea"

Ana Hermida, a nosa Rosalía de Castro, estará co alumnado do Ceip de Galán de Oseiro, parroquia arteixá onde naceu o patriarca Manuel Murguía, marido de Rosalía. Faremos un repaso pola biografía e pola obra da Nai das nosas letras, haberá representación teatral, dramatización da súa obra e participación do alumnado, que terá ocasión de poñer voz á nosa Poeta nacional e remataremos a gran festa Rosaliana dando lectura ao Manifesto da Aelg redactado este ano por Daniel Asorey.

O encontro de Rosalía co alumnado terá lugar o venres 28 de febreiro no salón de Actos do Ceip de Galán e comezará ás 09:20 h. con varias sesións para catrocentos cincuenta e tres escolares.

venres, 6 de decembro de 2019

“Un Nadal cheo de contos” na Biblioteca Ánxel Casal de Compostela

Poremos nos zapatiños de todas as nenas e nenos, contos feitos de maxia e ilusión. Cantaremos panxoliñas e contaremos historias que falan do sentido destas datas e que ás veces son divertidas, outras sorprendentes… contos de árbores de Nadal, de bonecos de neve, de Reis, de cousas imaxinadas e que, seguramente, algún día serán realidade.

A cita cos contos e coa maxia do Nadal será o sábado 7 de decembro, no salón de actos da Biblioteca Pública de Santiago Ánxel Casal, ás 12:00 h.

xoves, 21 de novembro de 2019

"A historia en Feminino" pecha os actos do 25N no Concello de Avión

Viaxamos á Comarca do Ribeiro para contar a "Historia en Feminino" no Concello de Avión, alí Ana Hermida fará un achegamento ao público das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, deportistas, escritoras, músicas… todas teñen cabida nesta historia en feminino.

Conmemoramos o 25N visibilizando ás mulleres borradas da historia, o xoves 28 de novembro ás 11:30 h., no Ceip Virxe de Guadalupe do Concello. Organiza o Concello de Avión xunto co Concello de Castrelo de Miño.

O Concello de Lobios inclúe "A historia en Feminino" dentro da súa programación polo 25N

O Concello de Lobios, pertencente á comarca da Baixa Limia, en Ourense, situado na Raia Seca, na fronteira entre Galicia e Portugal recibirá a visita de Ana Hermida para contar a "Historia en Feminino" e facer un achegamento ao público infantil e adulto das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, deportistas, escritoras, músicas… todas teñen cabida nesta historia en feminino. 

A cita coas mulleres borradas da historia, será o mércores 27 de novembro ás 12:30 h., na Ceip do Xurés do Concello de Lobios, con entrada libre e gratuíta.

luns, 18 de novembro de 2019

"Contando en feminino" en A Pobra do Brollón, dentro da campaña do 25N: En negro contra as violencias

O Concello de A Pobra do Brollón, que pertence á Comarca da Terra de Lemos, para conmemorar o 25N dentro da campaña: En negro contra as violencias, organizou unha ampla programación que inclúe Contando en feminino, onde Ana Hermida achegará á infancia historias contadas desde a perspectiva de xénero e igualdade, onde o rol feminino sexa, non o tradicional nos contos, senón algo igualitario. Contos tamén onde o final pode cambiar e onde a protagonista non se vexa como algo inferior e sempre coas mesmas identidades. Xogando e contando, apréndese a formar en igualdade.

A cita coa igualdade e co alumnado do Ceip A Pobra do Brollón, que tamén contará contos, será o luns 25 de novembro ás 11:30 h. na Casa da Cultura “Olga Novo”, a entrada é libre e gratuíta ata compretar aforamento.

mércores, 13 de novembro de 2019

O Concello de Antas de Ulla, celebrou o Día da Biblioteca contando “A historia en Feminino”

Ana Hermida viaxou ata a comarca da Ulloa, concretamente ao Concello de Antas de Ulla, para achegar ao público "A historia en Feminino", alí visibilizou ás mulleres borradas da memoria e deu a coñecer ao público as súas vidas marabillosas, os seus logros, achegou a realidade oculta durante séculos e amosoulles unha visión real da historia. A resposta foi a esperada, está a darme moitas satisfaccións ao comprobar a reacción do público infantil e adulto. Levo moitos anos tentando darlle o seu lugar ás mulleres que houbo ao longo da historia, as que aínda hoxe habitan nun ocultismo inxusto e das que na actualidade se contan moitas inexactitudes causando un dano terrible, aí estivemos nós para dicirlle ao público que é intelixente dabondo, que non crea todo o que se lle conta, que lea, que lea moito e teña o seu propio criterio. 

Quixera expresar os meus parabéns á organización, a Teresa Batán Buján, responsable da Biblioteca e toda unha institución no Concello, pola implicación na actividade, traballou coa infancia o tema e cando cheguei aí estaba ese público orgulloso contándome o que aprendera nos libros da biblioteca, así que seguimos contando historias reais de mulleres que sorprenden e fascinan moito máis que as de ficción, mostra do que digo é esta foto que comparto con vós para que comprobedes o que eu teño a sorte de ver día tras día cando conto historias de mulleres extraordinarias e así teñan referentes femininos. Agardo que espertara moitas inquedanzas e que a semente do feminismo xermole debidamente. Grazas por tanto como recibo, e aínda hai quen di que estou tola por facer o que fago, bendita tolería!.

luns, 11 de novembro de 2019

"A historia en Feminino" en Piñor dentro da campaña do 25N: Contra a violencia machista, Piñor feminista

O Concello de Piñor, pertencente á Comarca do Carballiño, programa un novembro violeta, co lema: contra a violencia machista, Piñor feminista. Dentro dos actos para conmemorar o 25N estará no acto central "A historia en Feminino", alí Ana Hermida fará un achegamento ao público das moitas e sobresaíntes, así como descoñecidas, mulleres que houbo ao longo da historia. Científicas, inventoras, aventureiras, deportistas, escritoras, músicas… todas teñen cabida nesta historia en feminino. 

Estaremos visibilizando ás mulleres borradas da historia, o venres 22 de novembro ás 19:30 h., no Salón de Actos do Concello de Piñor.

luns, 4 de novembro de 2019

"Contando en feminino" en Compostela

A Agrupación Folclórica Cantigas e Agarimos organiza esta actividade onde Ana Hermida contará historias desde a perspectiva de xénero e igualdade, onde o rol feminino sexa, non o tradicional nos contos, senón algo igualitario, onde o final pode cambiar e a protagonista non se vexa como algo inferior e sempre coas mesmas identidades. Contos tamén para concienciar no feminismo e loitar contra o abuso infantil e a violencia de xénero. 

Xogando e contando, apréndese a formar en igualdade. A cita coa igualdade, entre música, bailes e castañas do VII Magosto Foliadeiro, será o sábado 16 de novembro ás 17:45 h. no local de Cantigas e Agarimos en Compostela.


domingo, 20 de outubro de 2019

Celebramos o Día da Biblioteca no Concello de Antas de Ulla contando "A historia en Feminino"

Viaxaremos á Comarca da Ulloa para contar "A historia en Feminino" no Concello de Antas de Ulla, alí Ana Hermida fará un achegamento ao público infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, deportistas, escritoras, músicas… todas teñen cabida nesta historia en feminino. 
Estaremos visibilizando ás mulleres borradas da historia, o venres 25 de outubro ás 19:00 h., na Biblioteca de Antas de Ulla, que organiza esta actividade.

sábado, 19 de outubro de 2019

Estivemos en Bergondo no cabodano de Rosalía de Castro con "Tecín soia a miña tea"

Para conmemorar o 134º cabodano de Rosalía de Castro levamos a Bergondo á nosa Rosalía feminista, divertida, comprometida... Era a primeira vez que representaba a Rosalía de Castro nunha igrexa e a experiencia foi moi satisfactoria, son da opinión de que a cultura hai que achegala ao público en todos os espazos posibles e na Igrexa de Babío todo foi máxico. A obra da padronesa soaba na voz de Ana Hermida sorprendendo ao auditorio, espertando risas, emoción e participación. O acto estivo organizado por Rubén Aramburu, activista cultural e crego de Bergondo.

venres, 18 de outubro de 2019

Celebramos o Día da Biblioteca no Concello de Cambados contando "A historia en Feminino"

Pechamos a campaña de igualdade no Concello de Cambados celebrando o Día da Biblioteca contando "A historia en Feminino", alí Ana Hermida fará un achegamento ao público infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, deportistas, escritoras, músicas… todas teñen cabida nesta historia en feminino. Actividade organizada pola Concellería de Muller e Igualdade de Cambados en colaboración coa Concellería de Cultura. 

Estaremos visibilizando ás mulleres borradas da historia, o luns 21 de outubro ás 17:30 h., na Axencia de Lectura Municipal de Vilariño de Cambados, na Comarca do Salnés.

xoves, 17 de outubro de 2019

"A historia en Feminino" volve a Cambados para contar a vida e obra de mulleres extraordinarias

Volvemos á Comarca do Salnés para contar a "Historia en Feminino" no Concello de Cambados, alí Ana Hermida fará un achegamento ao público infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, deportistas, escritoras, músicas… todas teñen cabida nesta historia en feminino. Actividade organizada pola Concellería de Muller e Igualdade de Cambados en colaboración coa Concellería de Cultura.

Estaremos visibilizando ás mulleres borradas da historia, o venres 18 de outubro ás 17:30 h., na Axencia de Lectura Municipal Gumersindo Márquez Oubiña do Concello de Cambados.

domingo, 13 de outubro de 2019

“A historia en Feminino" arriba ao Concello de Baiona

Viaxaremos á Comarca de Vigo para contar a "Historia en Feminino" no Concello de Baiona, alí Ana Hermida fará un achegamento ao público infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, deportistas, escritoras, músicas… todas teñen cabida nesta historia en feminino. Actividade organizada polo Arquivo Histórico e Biblioteca Pública Municipal de Baiona Sancti Spiritus, Concellería de Cultura de Baiona.

Estaremos visibilizando ás mulleres borradas da historia, o mércores 16 de outubro ás 18:00 h., na Biblioteca de Baiona.

domingo, 6 de outubro de 2019

Celebramos o Día das Escritoras na Biblioteca Ánxel Casal de Compostela con "Palabra de Muller"

Celebramos o Día das Escritoras na Biblioteca Pública de Santiago Ánxel Casal, con "Palabra de Muller", no que, baixo o tema: mulleres, amor e liberdade, farase un percorrido pola obra de mulleres pioneiras, rebeldes, silenciadas, inxustamente tratadas, incomprensiblemente esquecidas... ás que queremos honrar nun acto onde varias persoas representativas da cultura e sociedade galega prestan a súa voz ás escritoras homenaxeadas. A actividade está dirixida ao público adulto e coordinada por Ana Hermida, de Lisístrata Asociación en colaboración coa Biblioteca Pública de Santiago Ánxel Casal.

Este día é unha iniciativa da Biblioteca Nacional de España (BNE), a Federación Española de Mulleres Directivas, Executivas, Profesionais e Empresarias (FEDEPE) e a Asociación Clásicas e Modernas (CyM).

Leremos textos de María Victoria Moreno, Sor Juana Inés de la Cruz, Ernestina de Champourcín, Maruxa Orxales, Dulce María Loynaz, Feliciana Enríquez de Guzmán, Pura Vázquez, Carmen Laforet, Montserrat Roig, Rosalía de Castro, Emilia Pardo Bazán, Isabel María Morón, Filomena Dato, Esther Tusquets, Luísa Villalta, Robustiana Mujika Egaña (Tene), Carmen de Burgos, María Mariño, Concepción Arenal, Anna Murrià, Xela Arias, Alfonsina Storni, Ana Carro de Mallén, María do Carme Kruckemberg, Alejandra Pizarnik, Dulce Chacón e Francisca Herrera Garrido.

Será o luns 14 de outubro ás 19:30 h no salón de actos da Biblioteca. A entrada é libre e gratuíta ata completar aforamento.

mércores, 2 de outubro de 2019

Seguimos contando "A historia en Feminino" en Cambados

Será a nosa terceira visita, das cinco previstas neste mes, para contar "A Historia en Feminino" no Concello de Cambados. Alí Ana Hermida fará un achegamento ao público infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, deportistas, escritoras, músicas… todas teñen cabida nesta historia en feminino. Actividade organizada pola Concellería de Muller e Igualdade de Cambados en colaboración coa Concellería de Cultura.

Estaremos visibilizando ás mulleres borradas da historia, o luns 7 de outubro ás 17:30 h., na Axencia de Lectura Municipal de Corvillón de Cambados.

martes, 1 de outubro de 2019

"Contando en feminino", contos de igualdade e violencia de xénero, no Concello de Arteixo

A Rede de Bibliotecas do Concello de Arteixo organiza esta actividade onde Ana Hermida contará historias ao público infantil desde a perspectiva de xénero e igualdade, onde o rol feminino sexa, non o tradicional nos contos, senón algo igualitario, onde o final pode cambiar e a protagonista non se vexa como algo inferior e sempre coas mesmas identidades. Contos tamén para concienciar e loitar contra o abuso infantil e a violencia de xénero. Xogando e contando, apréndese a formar en igualdade. 

A cita coa igualdade será o mércores 9 de outubro ás 11:00 h. na Biblioteca de O Froxel “Francisco Vidal y está dirixida ao alumnado do Ceip de Galán, na parroquia de Oseiro do Concello de Arteixo.

luns, 30 de setembro de 2019

"A historia en Feminino", a visibilización das mulleres ao longo da historia, en Cambados

En Cambados teñen unha nova cita coas mulleres extraordinarias de "A Historia en Feminino", unha actividade organizada pola Concellería de Muller e Igualdade en colaboración coa Concellería de Cultura. Ana Hermida achegará ao público as moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, deportistas, escritoras, músicas… todas teñen cabida nesta historia en feminino. 

Estaremos visibilizando ás mulleres borradas da historia, o xoves 3 de outubro ás 17:30 h., na Biblioteca Pública Municipal Luis Rei do Concello de Cambados.

venres, 27 de setembro de 2019

“A historia en Feminino" chega ao Concello de Cambados

Viaxaremos á Comarca do Salnés para contar "A Historia en Feminino" no Concello de Cambados, alí Ana Hermida fará un achegamento ao público infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, deportistas, escritoras, músicas… todas teñen cabida nesta historia en feminino. Actividade organizada pola Concellería de Muller e Igualdade de Cambados en colaboración coa Concellería de Cultura.

Estaremos visibilizando ás mulleres borradas da historia, o martes 1 de outubro ás 17:30 h., na Axencia de Lectura Municipal de Castrelo, en Cambados.

venres, 6 de setembro de 2019

A Biblioteca Ánxel Casal de Compostela acolle unha sesión de "Contos moi naturais"

Contaremos historias enfocadas a por en valor a natureza, a defensa do medio ambiente, contos que falan de contaminación, de incendios, do amor á natureza, aos animais… somos parte da natureza, somos naturais como as árbores, a auga, os paxaros… Xogando e contando defendemos o noso hábitat para así poder respectalo e coidalo debidamente.

Será o sábado 7 de setembro, no salón de actos da Biblioteca Pública de Santiago Ánxel Casal, ás 12:00 h.

venres, 9 de agosto de 2019

"Contando en feminino", contos para concienciar na igualdade e violencia de xénero, no Concello de O Carballiño

Ana Hermida viaxará ao Concello do Carballiño para contar historias desde a perspectiva de xénero e igualdade, onde o rol feminino sexa, non o tradicional nos contos, senón algo igualitario, onde o final pode cambiar e a protagonista non se vexa como algo inferior e sempre coas mesmas identidades. Contos tamén para concienciar e loitar contra o abuso infantil e a violencia de xénero. Xogando e contando, apréndese a formar en igualdade. 

A cita coa igualdade será o mércores 21 de agosto ás 12:00 h. na Biblioteca Pública Municipal do Carballiño, que organiza esta actividade para concienciar na igualdade e violencia de xénero.

xoves, 8 de agosto de 2019

Honrando a Filomena Dato en Bergondo, no aniversario do seu nacemento

Outro ano máis estivemos en Bergondo honrando A Filomena Dato, á que o seu amigo Pérez Lugín lle concedeu o título de “a poeta das Mariñas”, a escritora máis premiada do século XIX e académica correspondente da Real Academia Galega. Estivemos ofrecendo un recital da súa obra con “Ningún lazo a suxeita”, onde Ana Hermida puxo voz ás composicións da poeta. Foi na Igrexa de San Vicente de Moruxo, no Concello de Bergondo. O acto estivo organizado polo activista cultural e crego, Rubén Aramburu, xunto coa Asociación Cultural Lisístrata.

Desde hai anos Ana Hermida, da Asociación Lisístrata, leva facendo investigacións e unha serie de actividades para visibilizar e darlle o lugar que lle corresponde á figura e obra de Filomena Dato, polo que rexeitamos calquera aproveitamento que da poeta fan outras persoas e entidades “para o seu propio lucimento e beneficio” coas aportacións realizadas por nós. Cousa propia de xente covarde, necia, sen principios e carente de talento é apropiarse do traballo dunha muller e invisibilizala. 

mércores, 7 de agosto de 2019

Estaremos contando “A historia en Feminino” no Concello de O Carballiño

Viaxaremos á Comarca do Carballiño para contar a "Historia en Feminino", alí Ana Hermida fará un achegamento ao público infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, deportistas, escritoras, músicas… todas teñen cabida nesta historia en feminino. Actividade organizada pola Biblioteca Municipal do Carballiño.

Estaremos visibilizando ás mulleres borradas da historia, o mércores 14 de agosto ás 12:00 h., no Salón de Actos da Biblioteca Pública Municipal do Concello do Carballiño.

mércores, 31 de xullo de 2019

“Contando en feminino” no Concello de Esgos

Ana Hermida viaxará ao Concello de Esgos, na Comarca de Ourense e Ribeira Sacra, para contar historias contadas desde a perspectiva de xénero e igualdade, onde o rol feminino sexa, non o tradicional nos contos, senón algo igualitario, onde o final pode cambiar e a protagonista non se vexa como algo inferior e sempre coas mesmas identidades. Contos tamén para concienciar e loitar contra o abuso infantil e a violencia de xénero. Xogando e contando, apréndese a formar en igualdade. 

A cita coa igualdade será o martes 6 de agosto ás 11:00 h. na Biblioteca Pública Municipal do Concello de Esgos, que organiza esta actividade para as nenas e nenos que participan no campamento de verán.

domingo, 14 de xullo de 2019

Bergondo conmemora o cabodano de Rosalía de Castro con "Tecín soia a miña tea"

Ana Hermida fará unha homenaxe a Rosalía de Castro mediante a dramatización dos seus poemas nun espectáculo que pretende amosar unha Rosalía actual, como os temas que ela trata, tan vixentes hoxe en día. A relación cos homes, a defensa da muller, da súa terra... O desexo e ansias súas polo teatro "eu quería ser actriz e non me deixaron". Unha Rosalía, a veces divertida, outras reivindicativa, dura. Unha muller interpretando a outra muller. Poemas, teatro, e algunha canción para honrar a nai da nosa terra no seu 134 cabodano. Actividade organizada polo activista cultural e párroco de Bergondo, Rubén Aramburu.

A cita con Rosalía será o martes 16 de xullo ás 20:30 h. na Igrexa de Santa Marta de Babío, en Bergondo.

martes, 25 de xuño de 2019

"Feministorias", unha cita coa infancia e o feminismo, na Biblioteca Ánxel Casal de Compostela

A infancia coñecerá, dun xeito divertido e ameno, a historia que non está nos libros de texto, a das nosas avoas e bisavoas que ergueron a voz e loitaron para cambiar o mundo. Nenas e nenos tenden a sentirse protagonistas das historias, polo que lles achegaremos referentes moi coidados e mediante contos, curiosidades e xogos repasaremos os logros e a evolución do feminismo ata os nosos días. Porque o feminismo tamén pode ser divertido.

A cita co feminismo será o sábado 29 de xuño no Salón de Actos da Biblioteca Pública de Santiago Ánxel Casal, ás 12:00 h. con entrada libre e gratuíta ata completar aforamento.

venres, 14 de xuño de 2019

“Miña casiña, meu lar”, teatro contra a violencia de xénero no Concello de Pontedeume

Enfocada dende un punto de vista humorístico, amosa a realidade da muller no seu entorno diario, reflicte a crúa situación das mulleres maltratadas, tanto no físico, coma no verbal, sexual, laboral, psíquico… Diferentes situacións, diferentes mulleres e unha soa actriz que dá vida a todas elas. Sempre cun eixo común, a inxusta realidade coa que se atopan, aínda hoxe, as mulleres no seu día a día. Todo esto posto enriba dun escenario para tentar concienciar ao público e promover o debate sobre o tema. 

Será o venres 21 de xuño ás 20:30 h., na Casa da Cultura do Concello de Pontedeume. 

xoves, 23 de maio de 2019

Conmemoramos o 25N Contando en femininino en Compostela

O Concello de Santiago de Compostela organizou unha sesión de Contando en feminino, actividade que tivo lugar no Centro Sociocultural de Pontepedriña, dentro dos actos da campaña do 25N “En negro contra as violencias”, para concienciar na igualdade e violencia de xénero. Atopeime cun público infantil e adolescente moi participativo e diverso e conteilles varias das historias que viaxan comigo e que están pensadas para provocar unha reacción. O resultado é sempre o esperado, o que me produce unha enorme satisfacción, así como as reflexións que fan e o debate posterior, é moi enriquecedor, aprendo tanto da súa inxenuidade, da súa mente sen contaminar, do claro que teñen todo… Sei que medrarán en igualdade e farán un mundo mellor e máis xusto.
 

domingo, 12 de maio de 2019

"Mitos e lendas de Galicia" na Biblioteca Ánxel Casal, para celebrar o Día das Letras Galegas

Contaremos a nosa historia máis máxica, lendas, historias tradicionais e populares que fagan entender e coñecer moitas cousas a nenas e nenos. Os porqués, os encantos, historias de trasnos, de feitizos, mitoloxía galega... tamén de temas históricos e de cabaleiros. Todas estas historias chegaron ata nós grazas a persoas como Antón Fraguas, a quen a Real Academia Galega lle adica o Día das Letras Galegas deste ano. “Eu traballei sempre por e para Galicia. Por amor á nosa Terra (Antón Fraguas).

Será o sábado 18 de maio no Salón de Actos da Biblioteca Pública de Santiago Ánxel Casal, ás 12:00 h. con entrada libre e gratuíta ata completar aforamento.

luns, 6 de maio de 2019

"A historia en Feminino" grandes historias de grandes mulleres para o gran público miúdo

Cando conto “A historia en Feminino” para o público máis miúdo, sempre teño que baixarme ao seu gran nivel. Canto se aprende destas persoíñas, non teñen filtros e razoan coa lóxica que as persoas adultas hai tempo que perderon. Disfruto delas ao igual que as nenas e nenos disfrutan coas historias das mulleres que lles achego. O meu oficio de dicir regálame momentos fermosos, como este da foto, a súa curiosidade innata fai que pregunten e queiran saber máis e máis… eso é o que pretendo, sementar para que xermole unha inquedanza feminista. Cando marcho énchenme a cara de bicos e regálanme apertas que sempre me acompañan e que agradezo cada día. Graciñas.

martes, 16 de abril de 2019

"Tecín soia a miña tea", a nosa homenaxe a Rosalía de Castro, segue a darnos moitas satisfaccións

A grandeza de Rosalía fai que sucedan feitos como este, un dos maiores premios que pode ter unha persoa co oficio de dicir. Ocorreu na representación de Tecín soia a miña tea, o público era escolar e persoas usuarias de Aspavi, quixen que participasen todas elas para una  plena inclusión e vin como fluía todo de maneira natural, foi moi fermoso. Ao rematar estaban agardando por min, querían unha foto conxunta, bicos, apertas, charlas… volveron recitar e falar de Rosalía, preguntaron que cando ía volver... foi moi emotivo, que mellor premio podo ter!