A historia en Feminino, as nosas grandes mulleres galegas

Estiven contando na Biblioteca de Barrionovo, en Pastoriza, a historia de grandes mulleres galegas. Non podía faltar Rosalía de Castro e outra gran muller, Helena Villar Janeiro, a valedora da padronesa universal e que tanto fixo pola figura de Rosalía. Mirade que imaxe tan fermosa!

Roteiro pola Fraga do Barragán en Pazos de Borbén

Hai unhas semanas estiven contando historias na Senda da Fraga do Barragán, no Concello de Pazos de Borbén, un día que quedará fixado para sempre na miña memoria. As sensacións alí vividas non se poden expresar con palabras. Estiven procurando unha foto que describa esa sensación e penso que esta é a axeitada, o que pretende amosar é a grandeza das persoas coas que compartín espazo, a fortaleza e a vontade dunhas e a xenerosidade e entrega doutras, todas me fixeron sentir tan pequena, sendo elas tan grandes, a miña admiración, rendición e unha tenrura infinita queda plasmada nesta instantánea realizada por José Manuel Soto Virulegio. 

Actividade organizada pola Biblioteca Pública Municipal de Pazos de Borbén - BiblioPazos, dirixida ao alumnado da Eso do Cpi Curros Enríquez e da Asociación Aspavi.

“Sabéndote, Rosalía”, na Biblioteca Ánxel Casal de Compostela

Coa inocencia propia da infancia, unha Rosalía aínda nena, irá debullando a súa vida entre versos, cancións e soños. Quen mellor que Rosalía para facelo? Moito se ten escrito da nosa poeta, pero aínda non está todo dito. É este un achegamento ao mundo infantil da Nai das nosas letras, a Rosalía defensora da muller, da súa terra, unha Rosalía reivindicativa, divertida…

A cita cos contos será o sábado 9 de decembro, no salón de actos da Biblioteca Pública de Santiago de Compostela, ás 12:00 h. e a entrada é libre e gratuíta ata completar aforamento.

Contando en feminino en Mondariz

Viaxaremos ata o Concello de Mondariz, alí Ana Hermida estará contando historias para ir concienciando ao público infantil na igualdade e violencia de xénero, onde o rol feminino sexa, non o tradicional nos contos, senón algo igualitario. Contos tamén onde o final pode cambiar e tamén onde a protagonista non se vexa como algo inferior e sempre coas mesmas identidades. Xogando e contando, apréndese a formar en igualdade.

O domingo 26 a cita coa igualdade será na Biblioteca Pública de Mondariz “Xoán Xosé Pérez Labaca”, ás 17:00 h.

Monólogos teatrais no 25N en Rois, con Miña casiña, meu lar

“Miña casiña, meu lar” amosa a realidade da muller no seu entorno diario, reflicte a crúa situación das mulleres maltratadas, tanto no físico, coma no verbal, sexual, laboral, psíquico… Diferentes situacións, diferentes mulleres e unha soa actriz que dá vida a todas elas. Sempre cun eixo común, a inxusta realidade coa que se atopan, aínda hoxe, as mulleres no seu día a día. Todo esto posto enriba dun escenario para tentar concienciar ao público na igualdade e violencia de xénero e promover o debate sobre o tema. 

A violencia contra mulleres e nenas pódese evitar. Hai moitas maneiras de previr a violencia nun principio e de deter a repetición dos ciclos de violencia. A prevención da violencia debe empezar nunha etapa temperá. O sistema educativo e o persoal docente están en contacto con nenas e nenos e novos e poden transmitir os principios de igualdade, respecto e actitudes non violentas ás xeracións futuras. Debemos alzar a voz contra o acoso e a violencia nas nosas casas, os nosos lugares de traballo, as nosas institucións, as contornas sociais e a través dos nosos medios de comunicación.

Neste amplo esforzo de poñer fin á violencia contra as mulleres e as nenas, entendemos que os homes desempeñan un papel vital para lograr o cambio. Facer fronte ao sexismo, ao predominio masculino e aos privilexios masculinos como a norma da sociedade empeza coa creación de masculinidades positivas. As nais e os pais poden instilar principios de igualdade, dereitos e respecto cando educan aos seus fillos homes; e os homes poden reprochar aos seus compañeiros comportamentos inaceptables aínda que en realidade estes representen unha pequeñísima parte do gran problema do acoso. A esencia do tema de hoxe de “Que ninguén quede atrás” como comunidade mundial, agora podemos poñer fin á violencia contra as mulleres e as nenas, transformar as institucións e unir esforzos para erradicar a discriminación, restaurar os dereitos humanos e a dignidade, e non deixar a ninguén atrás. (Phumzile Mlambo-Ngcuka).

Será o sábado 25 de novembro ás 20:00 h. no auditorio do Concello de Rois.

A historia en Feminino, unha volta por Galicia a través das súas mulleres, na EEI de Barrionovo

Faremos un achegamento ao mundo infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, escritoras, músicas… todas teñen cabida nesta historia en feminino. O alumnado da Escola de Educación Infantil de Barrionovo, está a traballar co proxecto: A volta a Galicia en 284 días, nese proxecto non podían faltar as mulleres, levaremos un feixiño delas, cun apartado específico para as científicas galegas, anque tamén haberá deportistas, escritoras, artistas, heroínas, etc. para que a infancia teña unha visión real e completa da historia da nosa terra.

A cita será o venres 24 ás 10:00 h. na biblioteca da Escola de Educación Infantil de Barrionovo, en Pastoriza, no Concello de Arteixo.

Peche da campaña do 25N en Boqueixón e Vedra con "A historia en Feminino"

Hoxe pechamos a campaña de concienciación na igualdade e violencia de xénero en todas as Escolas do Cra Boqueixón-Vedra “Neira Vilas” (Lestedo, Sarandón, Camporrapado, Sergude, San Fins e San Xián) para achegar unha versión da historia máis real e así poñer en valor a figura feminina. Faime especial ilusión facer esta actividade nunha escola que leva o nome de Neira Vilas, a quen tiven a sorte de coñecer.

Dou fe de que as familias coidan a coeducación e que o profesorado fai o seu traballo con moito mimo, polo que seguro que medrarán en valores. Esta actividade fíxose grazas á iniciativa da Anpa Val do Ulla, sempre concienciada na igualdade, polo que elixín A Historia en Feminino para tentar visibilizar ás mulleres borradas da memoria, coñecer as súas vidas marabillosas, os seus logros, achegar a realidade oculta durante séculos, amosarlles unha visión real da historia e podo asegurar que a resposta foi a que eu esperaba, está a darme moitas satisfaccións ao comprobar a súa reacción. Pretendo darlle o seu lugar ás mulleres que houbo ao longo da historia e que aínda hoxe seguen nun ocultismo inxusto, a infancia queda cos ollos ben abertos e sen pestanexar, é lóxico, son mulleres cunha historia e vida fascinte.

Será o mércores 15 na Escola de San Fins ás 09:30 h. e na Escola de San Xián ás 10:40 h., no Concello de Vedra.

A Coruña, outono en igualdade “Contando en feminino” polo 25N

Na Biblioteca Castrillón, pertencente ás Bibliotecas Municipais da Coruña, estivemos Contando en feminino para o público infantil e sigo a sorprenderme coa súa reacción tan de verdade. No medio da narración houbo un neno que coa súa voz inocente pediu “permiso, por favor”, entendín que tiña unha necesidade e que o seu corpo miúdo non aceptaba ningunha demora, mentres eu seguín contando e foi daquela cando deu a volta e díxome “por favor, non sigas ata que volva”, ante eso que ía facer eu? obedecín a súa petición e ocupamos o tempo facendo intercambio de opinións sobre personaxes do conto e o significado do mesmo, cando volveu sentou e con toda a educación dirixiuse a min dicindo “podes seguir”, cun sorriso nos ollos ante tamaña inocencia fixen o que me dixo. Canto agradezo vivir días tan bonitos e comprobar como as historias de igualdade e violencia de xénero son obxecto de tanta atención polo público infantil.

O ambiente era de conto, a biblioteca do Castrillón ten distintos recunchos, pequenos castros, onde a infancia atopa un espazo máxico para perderse na lectura e disfrutar de historias marabillosas onde as bibliotecarias de seguro serán as heroínas, guerreiras, fadas, inventoras... 

Contamos "A historia en Feminino" en Boqueixón, na campaña 25N

Mulleres científicas, guerreiras, inventoras, aventureiras, escritoras, músicas… todas teñen cabida nesta historia en Feminino. A través de contos, curiosidades, diversión e xogos, tentamos facer visibles ás mulleres e que a infancia teña unha visión máis real da historia. Organiza esta actividade a Anpa Val do Ulla, coñecedora da importancia da concienciación na igualdade e violencia de xénero. O profesorado do Cra Boqueixón-Vedra ten moita implicación co alumnado, Ana Hermida foi testigo en primeira persoa e sabemos que esas nenas e nenos medrarán en valores.

A cita coa historia en Feminino será o martes 14 na Escola de Camporrapado ás 09:30 h. e na Escola de Sergude ás 10:50 h., no Concello de Boqueixón. 

A infancia de Arteixo réndelle homenaxe a Rosalía na III edición do Concurso de Recitados que leva o seu nome

É unha enorme satisfacción ver á infancia recitando a Rosalía  e escoitar os seus poemas en distintos acentos nun concello multicultural como é Arteixo, a miña terra. A infancia toma o certame moi en serio, prepárase moito durante o ano para ese día ver recompensado tan grande esforzo. Cada ano é mellor, eu agradézoo moito xa ademáis de fomentar o amor por Rosalía e a súa obra, tamén vai en aumento o amor pola poesía e as nosas autoras, así como tamén se contribúe a fomentar o uso e amor polo noso idioma.

A Rede Municipal de Bibliotecas do Concello de Arteixo organiza o acto e Ana Hermida quen o coordina e conduce desde o seu inicio, hai xa tres anos. Na foto a gañadora deste ano, foi moi bonito vela e escoitala, ao igual que todas as nenas e nenos participantes, díxome que había tres anos que me vira dramatizando a Rosalía e que quixo facer algo semellante, respondinlle que ela facíao infinitamente mellor ca min, estaba coa súa irmá que non puido participar pola pouca idade e que ao remate tamén me recitou a Rosalía. Agardo con moita ilusión a próxima edición, seguro que me sorprenden gratamente. 

"A historia en Feminino" en Boqueixón e Vedra, campaña de concienciación na igualdade e violencia de xénero polo 25N

Ana Hermida fará un achegamento ao mundo infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, escritoras, músicas… todas teñen cabida nesta historia en feminino. A través de contos, curiosidades, diversión e xogos, tentamos facer visibles ás mulleres e que a infancia teña unha visión máis real da historia. Actividade organizada pola Anpa Val do Ulla do Cra Boqueixón-Vedra.

A cita coa historia en Feminino e coa igualdade e violencia de xénero será o luns 13 na Escola de Lestedo, do Concello de Boqueixón, ás 09:30 h. e na Escola de Sarandón, do Concello de Vedra, ás 10:40 h. 

Día das Letras Galegas en Santiso con “O encanto da fala”

Estivemos rendendo homenaxe ás mulleres e homes das Irmandades da Fala co recital-concerto  “O encanto da fala”, nun acto organizado pola ACV O Noso Lar de Visantoña, no Concello de Santiso e así celebrar o Día das Letras Galegas. Música, cancións e poesía foron o canle para achegar os textos máis representativos dun tempo que marcaría un fito histórico para a historia galega. Alí Ana Hermida recitou e cantou para un público especialmente interesado e respectuoso, o que demostra que aínda hoxe a mensaxe das Irmandades segue moi viva. Na foto, colocando a microfonía.

Coristanco celebra o Día da Biblioteca Contando en feminino

Ana Hermida viaxará ata Coristanco, na Comarca de Bergantiños, onde a Biblioteca Municipal organiza unha actividade dirixida ao alumnado do CPI Alcalde Xosé Pichel, para celebrar o Día da Biblioteca achegando historias contadas dende a perspectiva de xénero e así tentar concienciar na igualdade e violencia de xénero ao público infantil, historias onde o rol feminino sexa, non o tradicional nos contos, senón algo igualitario. Contos tamén onde o final pode cambiar e tamén onde a protagonista non se vexa como algo inferior e sempre coas mesmas identidades. Xogando e contando, apréndese a formar en igualdade.

A cita coa igualdade será na Casa da Cultura do Concello de Coristanco, o xoves 19 de outubro ás 10:30 h.

Faremos “Un roteiro cheo de historias” na Fraga do Barragán, en Pazos de Borbén e Fornelos de Montes

Os espazos que andamos cada día agochan segredos que convén coñecer, tamén o entorno natural está cheo de contos que iremos narrando nun percorrido cheo de historias da historia, lendas fascinantes, curiosidades e personaxes que gardamos na mochila para todas as nenas e nenos que se acheguen a facer este roteiro con nós, atréveste?

Actividade organizada por Bibliopazos, a Biblioteca Municipal do Concello de Pazos de Borbén e incluída na programación “Contos na Natureza” na que se pretende promover o uso da lingua galega e fomentar a animación á lectura a través da narración oral galega e apostando pola posta en valor do patrimonio arqueolóxico, etnográfico, natural e cultural do Concello. Está patrocinada pola Deputación de Pontevedra e a Xunta de Galicia.

No ano 2012, conscientes da necesidade de protección da fraga e da súa riqueza natural e cultural, as parroquias de Calvos e Traspielas (Fornelos de Montes) e as de Moscoso e Xunqueiras (Pazos de Borbén) xuntáronse para crear o proxecto: A Senda da Fraga do Barragán, que ten como obxectivos a súa conservación e divulgación do seu patrimonio natural e etnográfico.

Será o martes 10 de outubro ás 12:00 h. e está dirixido ao alumnado da Eso do CPI Curros Enríquez e da Fundación Aspavi.

"Tecín soia a miña tea", homenaxe a Rosalía de Castro

A nosa particular homenaxe a Rosalía de Castro, con Ana Hermida, non é algo puntual nin de datas no calendario, Rosalía leva con nós anos, levamos a súa obra, a súa palabra, a súa mensaxe... á rúa, aos colexios, aos institutos, aos teatros. Ela é o importante, quen ouse cambiarlle a súa imaxe para facela máis atractiva (ela xa era bonita dabondo), quen queira converter a súa figura nunha feira, quen se queira apropiar dela, quen pretenda convertela nun produto, está moi equivocada. Rosalía foi, é e será nosa, do pobo, por eso é grande.

Contaremos "A memoria en Feminino" en Pastoriza

Estimular a memoria durante a infancia é fundamental para o seu desenvolvemento. A través de contos, actividades e xogos recuperaremos a memoria das mulleres, a infancia coñecerá personaxes e pasaxes da historia feminina chea de desigualdades e inxusto silencio. Sacaremos do esquecemento ás mulleres para que sigan vivas na nosa memoria.

Será na Biblioteca de Pastoriza “Miguel Sande” do Concello de Arteixo, o xoves 28 de setembro ás 18:50 h. 

Conmemoramos o 25N en Cedeira contando "A historia en Feminino"

Achegamos A Historia en Feminino, da man de Ana Hermida, ao alumnado do Ies Punta Candieira. Foi no Auditorio do Concello de Cedeira, alí procuramos concienciar na igualdade e violencia de xénero, así como visibilizar ás mulleres borradas da memoria, coñecer a súa historia, os seus logros, a súa vida, achegar a realidade oculta durante séculos, cun apartado especial para as mulleres na Ciencia. Actividade programada para conmerorar o “Día Internacional da Eliminación da Violencia contra a Muller” 25N.

"Oriente máxico" na Biblioteca Ánxel Casal de Compostela

Queres que che conte unha historia extraordinaria e marabillosa? Viaxaremos a un mundo onde evocaremos ese lugar máxico onde todo é posible. Haberá historias de aventuras, mulleres intelixentes que vencen a brutalidade do rei, piratas, xenios, xigantes… De Persia a Exipto, da India ao Magreb, a forza da palabra sempre pode salvarnos das situacións máis complicadas.

A cita cos contos será o sábado 9 de setembro, no salón de actos da Biblioteca Pública de Santiago de Compostela, ás 12:00 h. e a entrada é libre e gratuíta ata completar aforamento.

"Ningún lazo a suxeita", homenaxe a Filomena Dato en Bergondo

Estaremos en Bergondo, onde o Concello organiza unha ofrenda floral a Filomena Dato “a poeta das Mariñas”, será no adro da igrexa de San Vicente de Moruxo, onde están enterrados os seus restos mortais. No vindeiro 26 de febreiro colocarase un busto á escritora que contará coa asistencia de representantes da Real Academia Galega (RAG), que traballa na actualidade na dixitalización de obras da autora.

Abrirá o acto Alejandra Pérez, alcaldesa de Bergondo, a continuación a obra de Filomena Dato soará na voz da actriz Ana Hermida, que representará o espectáculo "Ningún lazo a suxeita", continuará coa intervención musical das Gaiteiras de Bergondo que precederá á ofrenda floral que pechará esta sentida homenaxe aberta a toda a cidadanía.

Filomena Dato foi unha poeta profusamente premiada e unha das voces máis sobranceiras do feminismo e a segunda escritora, logo de Rosalía, que publicaría un libro en galego no século XIX. Para sacar do esquecemento á escritora xurdiu unha iniciativa que encabeza Rubén Aramburu, párroco de Bergondo, colaborando na mesma a Asociación Cultural Irmáns Suárez Picallo e a Asociación Cultural Lisístrata, que teñen previsto organizar diferentes actos, publicacións, etc. para achegar á cidadanía a obra e figura da poeta nacida en Ourense e falecida en Moruxo (Bergondo). 

Será o mércores 26, no cemiterio parroquial de San Vicente de Moruxo, ás 20:00 h.

"Animalandia" na Biblioteca Ánxel Casal de Compostela

Estaremos en Compostela contando historias de animais, onde nenas e nenos poderán descubrir a esquíos, gatas, coellos, porcas, raposos, cadelas… con características moi especiais e que posúen as mesmas calidades e defectos que teñen as persoas: inxenuas, engreídas, amables, ariscas, medorentas, pícaras, valentes… Son animais humanizados, do mesmo xeito que a súa contorna, as súas casas e as súas aventuras. 

Será o sábado 24 de xuño, no salón de actos da Biblioteca Pública de Santiago de Compostela, ás 12:00 h.

“Contadas na súa voz”, homenaxe a Carlos Casal na Biblioteca Ánxel Casal de Compostela

Rendemos unha merecida e sentida homenaxe ás mulleres e homes que crearon ás máis fermosas historias de todos os tempos. Repasaremos e sacaremos á luz a biografía de Carlos Casares, achegaremos a súa figura á infancia e reivindicaremos a súa obra. Serán historias contadas na súa voz, a de Carlos Casares, a quen este ano se lle dedica o Día das Letras Galegas.

Será o sábado 27 de maio, no salón de actos da Biblioteca Pública de Santiago de Compostela, ás 12:00 h.

I Maio Miúdo en Arteixo

Celebramos o renacer dos vexetais e o fin do inverno cos maios. Unha festa ou rito á fecundidade co fin de congraciarse co espírito da vexetación, instaurada polas primeiras agrupacións que de forma sedentaria se adicaron ó cultivo das terras e que estableceron un ritual animista naqueles momentos críticos da vida vexetal como son a sementeira, o florecemento e a recolleita.  Esta representación animista expresaríase con figuras humanas cubertas de flores e follas, pólas de árbores etc. 

Queremos recuperar as tradicións propias da cultura galega, como as coplas que acompañan os maios e algunha que outra sorpresa máis, que o pobo de Arteixo poderá disfrutar nesta festa do chamado Ciclo de Maio, grazas á colaboración xenerosa da Escola de Educación Infantil de Barrionovo, onde o seu alumnado será o protagonista animando as rúas e interactuando co pobo, ao que convidamos a participar da festa engalanando as súas casas e comercios con ramos de flores e a botarlles o maio cando lles canten as súas coplas.

A I Edición do Maio Miúdo terá lugar o venres 26 de maio, polo paseo fluvial ata a rúa peonil de Arteixo, entre as 10:00 e as 11:00 h.

Vilasantar celebra o Día das Letras Galegas “Contando en feminino”

Viaxaremos ao Concello de Vilasantar, na Comarca de Betanzos, para celebrar o Día das Letras Galegas Contando en feminino, unha actividade organizada pola Axencia de Lectura do Concello de Vilasantar. Ana Hermida levará contos e historias para ir concienciando ao público infantil na igualdade e violencia de xénero, onde o rol feminino sexa, non o tradicional nos contos, senón algo igualitario. Contos tamén onde o final pode cambiar e tamén onde a protagonista non se vexa como algo inferior e sempre coas mesmas identidades. Xogando e contando, apréndese a formar en igualdade.

A cita cos contos e coa igualdade, será o venres 12 de maio no Salón do Colexio de Présaras, ás 15:30 h.

“O encanto da fala” en Santiso, poesía e música para celebrar o Día das Letras Galegas

O Concello de Santiso celebra o Día das Letras galegas cun concerto-recital en homenaxe ás Irmandades da fala no seu centenario. Serán textos dos autores máis salientables e representativos dun tempo que marcaría un fito histórico para a historia galega. O recital está dirixido e interpretado por Ana Hermida, que estará acompañada polo músico Sergio López, nun espectáculo dirixido a todo tipo de público.

Será o domingo 14 de maio no local da ACV O Noso Lar de Visantoña, que organiza o acto, ás 18:00 h. e a entrada é libre e gratuíta.

Contamos historias “Sen etiquetas” ao alumnado da EEI de Meicende para celebrar o Día do Libro

Contaremos ás nenas e nenos historias para que aprendan a aceptar, respectar e comprender a identidade de cada persoa e amosar todos os afectos posibles entre os seres humanos, poñer ao seu alcance a diversidade de familias, todas elas válidas. A través dos contos tentamos visibilizar unha realidade e que a infancia medre na tolerancia e respecto. Celebramos por adiantado o Día Internacional contra la LGTBfobia (IDAHO), que é o 17 de maio e que ten como obxectivo promover accións de sensibilización en todos os países do mundo desde que a OMS elimara a homosexualidade feminina e masculina da lista de enfermidades mentais, anque a día de hoxe a transexualidade é aínda parte dos manuais de psiquiatría.

O alumnado da Escola de Educación Infantil de Meicende celebrará deste xeito o Día do Libro, na Biblioteca Antón Castro, o xoves 27 de abril ás 10:00 h. e 11:00 h.

A Biblioteca de Oseiro celebra o Día do Libro “Rimando e Xogando” con Manuel María

Ana Hermida volve render homenaxe á poesía galega, desta vez poñendo voz e alma á obra de Manuel María. Comprobo ano tras ano, cando fago este tipo de actividade, que infancia e poesía van xuntas da man, é unha maneira humilde de contribuír ao espallamento da lingua e cultura galega e a poñer en valor ás mulleres e homes poetas de Galicia, tentar que a infancia se achegue con cariño á poesía e fomentar as lecturas de noso.

Neste espectáculo contamos historias en verso, historias de risa, de medo, da natureza, de xogos, da fala, cantares de cego… historias e versos que ás veces tamén son cantados, historias unhas, con actividades para nenas e nenos e outras nas que interactúan coa contadora. Poemas axeitados á súa idade e que entenden perfectamente, pequenos xoguetes poéticos cheos de entretemento e diversión, desta maneira ese público tan especial sentirase atraído polos versos. 

A homenaxe á poesía galega será o luns 24 de abril, na Biblioteca de Oseiro Dora Vázquez, ás 18:50 h. 

O alumnado da EEI Municipal de Arteixo celebra o Día do Libro con “Contos moi naturais”

Contaremos historias enfocadas a por en valor a natureza, a defensa do medio ambiente, contos que falan de contaminación, de incendios, do amor á natureza, aos animais… somos parte da natureza, somos naturais como as árbores, a auga, os paxaros… Xogando e contando defendemos o noso hábitat para así poder respectalo e coidalo debidamente.

Mediante contos tentaremos concienciar no coidado e respecto á natureza e no amor aos libros, ao alumnado da Escola de Educación Infantil Municipal de Arteixo, que celebrará o Día do Libro na Biblioteca Henrique Rabuñal, o martes 25 de abril ás 10:00 h.

“Contadas na súa voz”, Carlos Casares no Día do Libro co alumnado da EEI de Barrionovo, en Pastoriza

Rendemos unha merecida e sentida homenaxe ás mulleres e homes que crearon ás máis fermosas historias de todos os tempos. Repasaremos e sacaremos á luz a súa biografía e reivindicaremos a súa obra. Serán historias contadas, na súa voz e coa nosa palabra, dunha literatura que levan disfrutado lectores dende hai anos, ata converterse nos clásicos de hoxe.

Achegaremos a figura e contaremos contos de Carlos Casares ao alumnado da Escola de Educación Infantil de Barrionovo, que celebrará o Día do Libro na Biblioteca Miguel Sande, o venres 28 de abril ás 10:00 h. e ás 11:00 h.

III Concurso de Recitados Homenaxe a Rosalía de Castro, en Arteixo

Este ano celébrase a terceira edición do concurso de recitados en homenaxe a Rosalía de Castro, que está organizado pola Rede Municipal de Bibliotecas do Concello de Arteixo e que será o broche de ouro a unha serie de actividades coas que conmemoran o mes do libro. Serán 12 participantes, de entre 8 e 12 anos, que levarán un libro de poesía como agasallo e a persoa premiada recibirá un libro electrónico. A encargada de conducir o acto será Ana Hermida, quen ademáis renderá homenaxe ás tres figuras máis representativas do Rexurdimento: Rosalía, Curros e Pondal.

A cita coa poesía será o martes 25, na Sala de Exposicións do Centro Cívico Cultural de Arteixo, ás 18:30 h. e a entrada é libre e gratuíta.

As “Mulleres no espello” estarán en Órbita Ao Redor da Muller en Compostela

Levaremos a Compostela ás mulleres que desde hai tempo acompañan nos escenarios a Ana Hermida, de Lisístrata Asociación, chegando a ser “Mulleres no espello”. Será unha ollada sobre a personalidade da muller, o amor, a vinganza, o erotismo, a paixón…

Será o vindeiro sábado 1 de abril, ás 18:00 h. en Os Catro Gatos galería de Arte de Delio Sanchez, en Compostela. Serán Espazos En Órbita Ao Redor Da Muller: OlaLab e Os Catro Gatos, de creación horizontal e colaborativa que se constrúe sumando experiencias e miradas femininas, nun enredo convocado para gozar, compartir e sumar. Poesía, arte, conferencias, performance, videocreación, talleres abertos de creatividade, documental, testemuñas, amigas e amigos, nun enredo convocado para gozar, compartir e sumar. Organizado por Os Catro Gatos e OLALAB Acción Cultural, con entrada libre ata completar aforo.

Estaremos en Órbita Ao Redor da Muller con “Miña casiña, meu lar”, en Compostela

“Miña casiña, meu lar” amosa a realidade da muller no seu entorno diario, reflicte a crúa situación das mulleres maltratadas, tanto no físico, coma no verbal, sexual, laboral, psíquico… Diferentes situacións, diferentes mulleres e unha soa actriz que dá vida a todas elas. Sempre cun eixo común, a inxusta realidade coa que se atopan, aínda hoxe, as mulleres no seu día a día. Todo esto posto enriba dun escenario para tentar concienciar ao público e promover o debate sobre o tema. 

Será o vindeiro sábado 1 de abril, ás 12:30 h. en Os Catro Gatos, no Concello de Santiago de Compostela. Evento de creación horizontal e colaborativa que se constrúe sumando experiencias e miradas femininas, nun enredo convocado para gozar, compartir e sumar. Poesía, arte, conferencias, performance, videocreación, talleres abertos de creatividade, documental, testemuñas, amigas e amigos, nun enredo convocado para gozar, compartir e sumar. Organizado por Os Catro Gatos e Olalab Acción Cultural, con entrada libre ata completar aforo.

Todas as personaxes que interpretei en escena me acompañan, personaxes que semellaban marchar cando caía o pano, pero que cavaron unha vida en min, dispostas a axudar ou destruír as personaxes que lles sucederon. Son grega, africana, siria, veneciana, rusa, brasileira, persa, romana, xaponesa, filipina, arxentina, norueguesa, coreana, alemá, austriaca, inglesa, realmente do mundo enteiro. Esa é a auténtica globalización.

Ao falar aquí non son eu. Non son unha actriz. Son só unha desas incontables personaxes grazas ás cales o teatro segue existindo. É un pouco o noso deber e a nosa necesidade. Como expresalo... nós non facemos que o teatro exista. É grazas ao teatro que nós existimos. O teatro é moi forte, resiste, sobrevive a todo, ás guerras, ás censuras, á falta de cartos. Abonda con dicir “a escena é un escenario baleiro dun tempo indeterminado” e facer entrar a un actor, ou unha actriz. Que vai facer? Que vai dicir? Van falar? O público espera, ese público sen o que non existe o teatro, non o esquezamos nunca. Unha soa persoa de público, é público. 

O teatro para min é diálogo, a ausencia de odio. A amizade entre os pobos. Non sei agora mesmo que significa exactamente, pero creo na comunidade, na amizade dos espectadores e os actores, na unión de todas ás que reúne o teatro, as que o escriben, as que o traducen, as que o explican, as que o visten, as que o decoran, as que o interpretan, mesmo, as que van. O teatro protéxenos, acóllenos... Creo de verdade que nos ama... tanto como o amamos. (Isabelle Huppert).

Contando en feminino en Ponteceso

Viaxaremos ata o Concello de Ponteceso, a vila natal de Eduardo Pondal, alí Ana Hermida estará contando historias para ir concienciando ao público infantil na igualdade e violencia de xénero, onde o rol feminino sexa, non o tradicional nos contos, senón algo igualitario. Contos tamén onde o final pode cambiar e tamén onde a protagonista non se vexa como algo inferior e sempre coas mesmas identidades. Xogando e contando, apréndese a formar en igualdade.

O venres 24 de marzo o alumnado do Ceip Eduardo Pondal ten unha cita coa igualdade, será na Biblioteca Pública Municipal do Concello ás 11:30 h. 

Mitos e lendas de Galicia no Concello de Outes

Estaremos no Concello de Outes contando a nosa historia máis máxica, será no Ceip Plurilingüe da Serra de Outes, o público será o alumnado de infantil e primaria para o que contaremos lendas, historias tradicionais e populares que fagan entender e coñecer moitas cousas a nenas e nenos. Os porqués, os encantos, historias de trasnos, de feitizos, mitoloxía galega... tamén de temas históricos e de cabaleiros.

A cita será o venres 10 de marzo na Biblioteca do Colexio, serán tres sesións: ás 10:00 h. o grupo de educación infantil, seguirá o primeiro ciclo de primaria ás 11:00 h. e o segundo ciclo de primaria ás 12:30 h.

Tivemos un Nadal en igualdade “Contando en feminino” na Biblioteca Ágora da Coruña

Nenas, igualdade, xogos, nenos, libros, contos, violencia de xénero, nais, historias, infancia, concienciación, pais,… verbas cun significado feito realidade grazas ás Bibliotecas Municipais da Coruña. Alí, no centro do saber, na casa das palabras, deuse cita este Nadal un encontro da igualdade coa infancia, para concienciar na loita contra a violencia de xénero ao público infantil que asistiu á sesión de contos na Biblioteca Ágora do Concello da Coruña. Teño comprobado que as historias son un medio marabilloso para que reflexionen, opinen, decidan que está ben e que está mal e... sempre acertan. Ben quixera eu que as persoas adultas tivesen tan claro que un insulto non se pode consentir, que hai cousas que non se deben facer. É realmente gratificante ver como seres transparentes teñen a verdade no seu corazón, espero e desexo que sigan ese camiño no futuro, así mo prometeron e eu sempre creo na súa palabra.

O Voitre e a Pomba, a forza da palabra contra o terrorismo machista, en Oleiros

Estivemos no Concello de Oleiros concienciando na igualdade e violencia de xénero ao alumnado do Ies Miraflores. Enriba do escenario estaba a mellor arma, a palabra, actor e actriz dándolle vida a textos duros de mulleres e homes, textos que que fan remexer conciencias. Santiago Fernández e Ana Hermida, antes de converternos en personaxes, sempre facemos unha lectura do manifesto contra a violencia de xénero, momento que recolle a foto, a continuación vai a representación e para rematar o debate. O que pretendemos é facer reflexionar, crear conciencia colectiva e persoal sobre a igualdade e violencia de xénero, cando rematamos e o público adolescente se achega a facernos comentarios sobre o que viviron, parece que o obxectivo está cumprido. A actividade estivo organizada pola Anpa Miguel Hernández, á que agradecemos o seu compromiso coa igualdade e a cultura, grazas tamén ás persoas responsables do Instituto e ao público adolescente polo seu comportamento exemplar.

Monólogos contra a violencia de xénero no Concello de Miño, coa obra “Miña casiña, meu lar”

O Concello de Miño conmemorou o 25N con monólogos para concienciar na igualdade e violencia de xénero.  Ana Hermida despois da súa actuación teatral, propiciou un debate no que o público estivo moi participativo e foi, coma sempre, moi enriquecedor. Agradezo a súa participación e tamén a boa disposición das persoas do Concello responsables de que actos coma este se leven a cabo. Sorprendeume moi gratamente saber que, entre as persoas que participaron no debate, estaban responsables da política do Concello, Alcalde Ricardo Sánchez Oroza, Concelleiras… polo que non quero deixar de agradecer a súa implicación na loita contra o terrorismo machista. 

Así foi o "Día de Rosalía" en Arteixo

Este ano o Concello de Arteixo declarou o 24 de febreiro “Día de Rosalía”, con tal motivo o alumnado do Ies Manuel Murguía asistiu durante dous días con dúas sesións diarias ao espectáculo “Tecín soia a miña tea”, onde Ana Hermida fixo unha dramatización sobre a obra da poeta, nas que tamén se falou da súa vida, obra, houbo preguntas, debate, teatro, poesía… actividade organizada pola Concellería de Cultura en colaboración coas Bibliotecas do Concello. Esta mañá tivo lugar no Anfiteatro o acto central aberto á cidadanía na que se leu a súa obra por todas as persoas que libremente por alí se achegaron a homenaxear a Rosalía no aniversario do seu nacemento.

Abriu o acto Inés Ramos Álvarez, Concelleira de Servizos Sociais e da Área de Benestar Comunitario, que fixo alusión ao pleno onde se acordou declarar o 24 de febreiro Día de Rosalía no noso concello. Seguidamente Ana Hermida leu o Manifesto da AELG, que este ano redactou Ledicia Costas. A voz de Rosalía comezaba a soar nas voces do pobo, xente que ía de paseo e achegouse a ler a obra, nenos que participaron do Certame de Recitados Rosalía de Castro que se celebra cada ano organizado pola Concellería de Cultura e as Bibliotecas de Arteixo, persoas que viñan da compra e alí mesmo elixiron o poema para poñerlle voz, outras xa traían o seu libro co poema preparado, mocidade, infancia, persoas adultas… a poeta do pobo na voz do pobo.

A representación institucional estivo nas voces de Inés Ramos e da Concelleira de Cultura e Festas Ana Bello, en representación do goberno popular do Concello, que tamén leron poemas pare render homenaxe á escritora, así como a concelleira Susana Lebón, en representación do partido socialista, que fixo a súa lectura e reflexións sobre o significado de Rosalía para ela. Alfredo Ferreiro, escritor afincado en Arteixo, deu lectura ao poema Traición a Rosalía de Castro, creación a partir doutro de Rosalía, o Airiños, airiños aires. 

Pechouse o acto coa homenaxe á estatua de Rosalía en Compostela no centenario da súa inauguración, lembramos como naceu a idea, como se xuntaron os cartos, a participación do pobo, a xenerosidade e esforzo de Fraiz, a contribución do alumnado da época, os discursos, etc. Todo acompañado cunha exposición de Rosalía, da súa familia, da súa vida, da inauguración da estatua de Rosalía. Quixen estar arropupada por ela, polo que levei esa exposición da miña propiedade, como tamén quixen que estivera presente alguén moi importante e á que lle debemos moito, Helena Villar Janeiro, alí estaba o seu traballo a modo de libro infantil “Rosalía”, para que todas as nenas e nenos que quixeran, poideran ler a voz de toda unha experta en Rosalía.

O noso agradecemento a todas as persoas que participaron do acto, tanto na lectura como ao público que asistiu á homenaxe. 

Arteixo achega a figura de Rosalía de Castro ao público escolar con "Tecín soia a miña tea"

Hoxe Rosalía de Castro, na voz de Ana Hermida, volverá estar co alumnado do Ies Manuel Murguía. Faremos un repaso pola súa biografía e pola súa obra, haberá representación teatral, dramatización da súa obra e participación do alumnado, que terá ocasión de poñer voz á nosa Poeta nacional.

É o segundo día de encontro co público escolar, realmente é moi gratificante comprobar o gran interese sobre a súa obra, a súa vida, a súa familia, había moitas mans erguidas para aclarar dúbidas.., teñen xa unha imaxe dunha Rosalía loitadora, feminista, comprometida e dona dunha obra de inmensa valía. Aínda resoan na miña mente as risas estrondosas dese público que onte disfrutou coa obra Rosaliana.

A actividade está organizada pola Biblioteca do Concello de Arteixo e dirixida ao alumnado do Ies Manuel Murguía para celebrar o Día de Rosalía. Serán dúas sesións, na Sala de Exposicións do Centro Cívico Cultural, a primeira comezará ás 11:00 h. e a seguinte ás 13:00 h.

O Concello de Arteixo celebra o Día de Rosalía cun acto aberto á cidadanía

Despois dunha semana con actividades dirixidas ao público escolar, o Concello de Arteixo celebra o Día de Rosalía co acto central e aberto a todo o público, onde Ana Hermida dará lectura ao Manifesto da AELG, que este ano foi redactado por Ledicia Costas. Tamén haberá lugar para que todas as persoas que por alí se acheguen participen coas súas lecturas da obra de Rosalía. Neste ano celébrase o 180 aniversario do nacemento de Rosalía e o centenario da inauguración da estatua que dela hai en Compostela, e que tamén será obxecto dunha homenaxe neste acto público, facendo unha lembranza daquel día.

Convidamos á toda a cidadanía de Arteixo a que participe desta gran festa Rosaliana, será o venres 24 ás 12:00 h. no Anfiteatro de Arteixo.

Arteixo celebra o Día de Rosalía con "Tecín soia a miña tea"

O 22 de febreiro Rosalía de Castro visitará o concello de Arteixo, onde naceu o seu marido Manuel Murguía. Celebraremos o Día de Rosalía con Ana Hermida, que achega a súa obra "Tecín soia a miña tea", para homenaxear á nai das nosas letras.

Serán dramatizacións de poemas de Rosalía de Castro. Este espectáculo pretende amosar unha Rosalía actual, como os temas que ela trata, tan vixentes hoxe en día. A relación cos homes, a defensa da muller, da súa terra... O desexo e ansias súas polo teatro "eu quería ser actriz e non me deixaron". Unha Rosalía, a veces divertida, outras reivindicativa, dura. Unha muller interpretando a outra muller para honrar a nai da nosa terra.

Serán dúas sesións, na Sala de Exposicións do Centro Cívico Cultural, para o alumnado do Ies Manuel Murguía. A primeira comezará ás 11:45 h. e a seguinte ás 13:00 h.

Deixamos "Un Nadal cheo de contos" na Biblioteca Ánxel Casal de Compostela

Comezamos con cancións e contos de Nadal e rematamos con cantares de Reises, o público da Biblioteca Ánxel Casal é moi participativo, foron moitas as nenas e nenos que quixeron deleitarnos coas súas particulares panxoliñas, momento que disfrutamos todas as persoas presentes. Ver o interese que teñen polas nosas tradicións de Nadal, así como escoitar á infancia cantar as nosas panxoliñas é algo que non ten prezo, é sementar amor pola lingua galega, pola nosa cultura, polas nosas tradicións… Marcharon aprendendo a pedir o aguinaldo mentres eu quedaba co sorriso nos ollos.