Picaradas o Día do Libro na Biblioteca Central de Arteixo

Chegaron cediño e sentaron no sitio xa preparado para disfrutar na biblioteca, escoitaron con moita atención todas esas historias que saían dos libros, xoguetes que tiveron nas súas mans cando remataron os contos. É fermoso ver como nais, país e profesorado se implican nestas actividades, así como tamén é precioso e gratificante ver as súas manciñas collendo libros e libros, descubrindo letras, cores, debuxos... fantasías.

Que mellor xeito de celebrar o Día do Libro que achegando a lectura ao público que aínda non sabe ler, fomentando o amor polo marabilloso mundo dos libros. Houbo tempo para cancións, así que tiven que escoitar "outra vez" e ata tres veces cantamos unha das súas preferidas.

Contos e lendas populares na Biblioteca Pública de Santiago Ánxel Casal

Espectáculo para a rapazada baseado en contos, lendas... historias tradicionais e populares que fagan coñecer e entender moitas cousas á infancia. Os porqués, os encantos, historias de trasnos, de feitizos... tamén de temas históricos e de cabaleiros. Historias e lendas tradicionais con cancións populares para o público máis pequeno.

Será o sábado 2 de maio no salón de actos da Biblioteca Pública de Santiago Ánxel Casal, ás 12:00 h.

A Escola Infantil Municipal de Arteixo celebra o Día do Libro con Picaradas na Biblioteca Central

Contos, historias, rimas, cancións… a biblioteca será unha festa para ese público tan esixente, saben que é o lugar onde habitan seres fantásticos e máxicos, un lugar onde a imaxinación voa mentres miran as letras e as ilustracións. Libros que pasan de man en man mentres constrúen a súa propia historia. Volverei cantarlles as súas cancións preferidas, esas que cantan e bailan sen parar. Para min é un pracer, xa que ademáis aprenden a amar a nosa lingua, a musicalidade das palabras tan nosas. 

As Picaradas estarán agardando por todas as nenas e nenos da Escola Infantil Municipal, o venres 24 na Biblioteca Central de Arteixo, ás 10:30 h.

Picaradas para celebrar o Día do Libro na Biblioteca de Pastoriza

A Biblioteca Municipal de Pastoriza foi unha festa cando contos, bebés e libros se xuntaron para celebrar o Día do Libro con Picaradas. Era un público moi especial, chegaron con ilusión e, tal como se aprecia na foto, cos seus peluches e bonecos, a ese lugar onde, según me dixeron, contaban contos e había libros moi bonitos.

Repetían outra vez, outra vez... así foi como ata en tres ocasión tiven que lles cantar unha das súas cancións preferidas, cantaban, bailaban, xogaban, rían... colleron nas súas pequenas manciñas os libros que eu lles deixei ao remate da contada, pasaban as follas, imaxinaban historias, repetían as que eu lles contara, recoñecían letras... A visión era marabillosa, o chan cheo de libros, bebés, fantasías... que mellor xeito de festexar o Día do Libro!

A Biblioteca do Porriño celebra o Día do Libro "Contando en feminino"

A Biblioteca Municipal do Concello do Porriño acolle unha sesión de contos de igualdade e non violencia de xénero. A data elixida foi o Día do Libro, xa que os libros son un medio moi propicio para concienciar neste tema dende a máis tenra infancia.

Serán historias para ir concienciando ao público infantil, onde o rol feminino sexa, non o tradicional nos contos, senón algo igualitario. Contos onde o final pode cambiar e tamén onde a protagonista non se vexa como algo inferior e sempre coas mesmas identidades. Xogando e contando, apréndese a formar en igualdade.

A Escola Infantil Municipal de Pastoriza celebra o Día do Libro con Picaradas

Os libros a estas idades son pequenos xoguetes que axudan a estimular os sentidos, espertar a imaxinación e recoñecer o seu pequeno mundo. Son persoas observadoras, imaxinativas e moi selectivas. Durante media hora teremos cancións, xogos, rimas… e historias para procurar que se acheguen ao mundo dos libros e ás súas primeiras lecturas.

O público será o alumnado da Escola Infantil de Pastoriza que celebrará o Día do Libro na Biblioteca Central de Arteixo "Henrique Rabuñal", o martes 21 de abril ás 10:30 h.

Así foi a sesión de Contos moi naturais, na Biblioteca Central de Arteixo

Foi unha sesión na que houbo contos, reflexión, diversión... un pai participou contando e explicándolles cousas que as nenas e nenos non pensaban que poideran pasar por estas terras. Tamén volvín comprobar que teñen conciencia de coidar e protexer o medio ambiente, agardo que medren neses valores. Ao final, como se aprecia na foto, comprobaron que todo se recicla, mesmo en marabillosas figuras. Levaron algunha figuriña feita en origami dicindo que querían aprender, sei que o farán.

Estivemos contando "Mitoloxía para xente miúda" en Meicende

A Biblioteca Antón Castro de Meicende acolleu unha sesión de historias fantásticas, historias nas que ese público miúdiño abría os ollos para non perder ningún detalle daqueles seres fascinantes, preguntaban, querían saber máis e máis... sen dúbida é un tema que lles atrae moito. Ao remate convidei a unha nena a que nos contara a todas as persoas que alí estabamos algo do que escoitara... foi moi gratificante, non perdera detalle. 

Levamos á Biblioteca Ánxel Casal os nosos Contos moi naturais

O público da biblioteca estaba moi concienciado, aprendemos a reciclar, falamos de historias de contaminación, de protexer o medio ambiente.... foi unha sesión moi especial, xa que contamos entre o público con Rodrigo e a súa nai, viñan da terra do Cid, como el mesmo me dixo, así que as historias da nosa terra marcharon para Burgos. As nenas e nenos que se achegaron pola biblioteca dixéronme que tamén querían defender o medio ambiente, como fixeron as personaxes dos contos... algunhas ficticias e outras moi reais.

Cando representamos en San Sadurniño "O Voitre e a Pomba" o 25N

A Casa da Cultura acolleu o 25 de novembro a obra "O Voitre e a Pomba", con Ana Hermida e Santiago Fernández. Unha peza moi dura que reflicte nas táboas a crueza e sufrimento das vítimas do maltrato físico e psicolóxico.

"A elección dunha obra tan potente e directa foi algo premeditado, xa que a preadolescencia e a adolescencia son dous grupos de poboación aos que máis cómpre concienciar" afirmou a Concelleira de Igualdade, Ana Breijo Gundín.

Contando en feminino na Biblioteca Municipal de Lugo

Contos contados dende a perspectiva de xénero e igualdade. Contos e historias para ir concienciando ao público máis novo, onde o rol feminino sexa, non o tradicional nos contos, senón algo igualitario. Contos tamén onde o final pode cambiar e tamén onde a protagonista non se vexa como algo inferior e sempre coas mesmas identidades. Xogando e contando, apréndese a formar en igualdade.

Será o xoves 9 de abril na Biblioteca Municipal de Lugo, ás 18:30 h.

O Concello de Ponteareas recolle na súa páxina a nosa visita Contando en feminino

Aparece recollida na páxina web do Concello una reseña de Contando en feminino, contos de igualdade e non violencia para o público infantil, facéndose eco da visita que Ana Hermida fixo á Axencia de Lectura de Guillade.

A información está neste enlace "CONTANDO EN FEMININO", CONTOS PARA A IGUALDADE, ENCANDILARON ESTE MARTES NA AXENCIA DE LECTURA MUNICIPAL DE GUILLADE, EN PONTEAREAS

O Concello de Lugo inclúe Contando en feminino na súa programación cultural de primavera

O Concello de Lugo inclúe dentro da súa programación cultural “Contando en feminino”. A Biblioteca Muncipal será o espazo reservado para concienciar ao público máis novo na igualdade e non violencia e será coa lectura, co máxico mundo das historias e dos libros.

Os contos xa están preparados para todas as nenas e nenos que por alí se acheguen.

A Biblioteca Pública de Santiago Ánxel Casal acolle unha sesión de Contos moi naturais

Esta fin de semana haberá “Unha choiva de contos” enfocados a por en valor a natureza, a defensa do medio ambiente, contos que falan de contaminación, de incendios, do amor á natureza, aos animais… somos parte da natureza, somos naturais coma as árbores, a auga, os paxaros… xogando e contando, defendemos e concienciamos da importancia do noso hábitat e asi respectalo e coidalo debidamente.

Será o sábado 4 de abril, no salón de actos da Biblioteca Pública de Santiago Ánxel Casal, ás 12:00 h.

Contando en feminino na Axencia de Lectura de Guillade, Ponteareas, no Blog de Ler conta noito

O blog de Ler conta moito, da Consellería de Educación e Cultura da Xunta de Galicia, faise eco da visita que realizou Ana Hermida á Axencia de Lectura Municipal Trovador Xoán García de Guillade, no concello de Ponteareas, onde estivo "Contando en feminino" para as nenas e nenos do CEIP Santiago de Oliveira.

Deixamos o enlace da actividade CONTANDO EN FEMININO NA AXENCIA DE LECTURA DE GUILLADE

Sesión de Contos moi naturais na Biblioteca Central de Arteixo

Serán contos enfocados a por en valor a natureza, a defensa do medio ambiente, contos que falan de contaminación, de incendios, do amor á natureza, aos animais… somos parte da natureza, somos naturais coma as árbores, a auga, os paxaros… xogando e contando, defendemos e concienciamos da importancia do noso hábitat e asi respectalo e coidalo debidamente.

A cita cos contos sobre o medio ambiente será o xoves 26 de marzo ás 18:50 h., na Biblioteca Central de Arteixo "Henrique Rabuñal".

Contando en feminino na Biblioteca de Ponteareas

Os contos sobre a igualdade viaxan ata a Comarca do Condado, unha terra con historia que garda na súa memoria historias fascinantes.

Contaremos historias para ir concienciando ao público máis novo, onde o rol feminino sexa, non o tradicional nos contos, senón algo igualitario. Contos tamén onde o final pode cambiar e tamén onde a protagonista non se vexa como algo inferior e sempre coas mesmas identidades. Xogando e contando, apréndese a formar en igualdade.

A cita será coas nenas e nenos do CEIP Santiago de Oliveira o martes 24 de marzo ás 12:00 h., na ALM Trovador Xoan García de Guillade, no Concello de Ponteareas.

Contos de igualdade en Narón, para celebrar o Día Internacional da Muller

A Biblioteca Pública Muncipal de Narón organizou, con motivo do Día Internacional da Muller, unha actividade para concienciar ao público infantil en temas de igualdade e violencia de xénero.

Estivemos contando para todas as nenas e nenos que por alí se achegaron. Era bonito ver o ritual da entrada, chegaban na sala coa súa entrada na man e procurando o mellor sitio para escoitar con atención as historias que se lles ían contar. Foi un día onde o público, tanto infantil como adulto, tivo un alto grao de implicación na actividade. 

Estivemos Contando en feminino para as nenas e nenos de Valdoviño

O Concello de Valdoviño celebrou o Día Internacional da Muller cun amplo programa, dentro do cal estaba incluída a nosa actividade "Contando en feminino", dirixido a un público familiar.

As nenas e nenos escoitaron, preguntaron, riron, sacaron as súas conclusións... e quedaron coa mensaxe que se pretendía achegar. A proba foi un debuxo que resume á perfección todo o que se lles contou. Estrela, unha nena do público, mentres eu recollía, achegouse  e entregoume ese bonito agasallo que, dende ese día, gardo con moito cariño.

San Sadurniño, risas e reflexión no Día Internacional da Muller, con "Miña Casiña, meu lar"

Nada mellor para denunciar a situación da muller que unhas risas que invitan á reflexión. Textos que reflicten e amosan a cruel realidade das mulleres maltratadas, explotadas, infravaloradas... Para rir fai falta intelixencia, agudeza, na gargallada ábreselle a boca, pero tamén o cerebro e no cerebro crávanseche os cravos da razón.

O público de San Sadurniño foi un público que respondeu ás expectativas e así ao remate da actuación tivo lugar o debate no que houbo intercambio de opinións e moita implicación, ese debate que sempre busco... sempre tan enriquecedor.

A infancia de Compostela celebrou o Día da Poesía Rimando e Xogando

O público non puido ser máis participativo, cantou, rimou, xogou e, por suposto, recitou. Moitas mans erguidas para ler os poemas nunha mañá de sábado na que, aínda cun día espléndido, as nenas, nenos e tamén as persoas adultas se achegaron á Biblioteca Pública Ánxel Casal, para disfrutar da poesía.

Tamén algún aldulto quixo competir cos recitados do público infantil, outro fíxoo acompañado do seu fillo... É bonito ver como nais e pais dan un fermoso exemplo participando das actividades. Nomes como Helena Villar, Manuel María, Rosalía de Castro, Xesús Rábade, Anisia Miranda... xa lles son familiares, así como a súa obra poética coa que disfrutaron e aprenderon a amar esta terra nosa de poetas. 

Contando en feminino na Biblioteca Pública Municipal de Narón

Serán contos contados dende a perspectiva de xénero e igualdade. Contos e historias para ir concienciando ao público máis novo, onde o rol feminino sexa, non o tradicional nos contos, senón algo igualitario. Contos tamén onde o final pode cambiar e tamén onde a protagonista non se vexa como algo inferior e sempre coas mesmas identidades. Xogando e contando, apréndese a formar en igualdade.

A cita cos contos e coa igualdade será o sábado 14 ás 11:00 h. na Biblioteca Pública Municipal de Narón.

Mitoloxía para xente miúda na Biblioteca Antón Castro de Meicende

As nenas e nenos de Meicende terán a oportunidade de escoitar historias de aventuras sobrehumanas de heroes lendarios, de deuses que dominaban a terra, contos cheos de fantasía. Mitos fantásticos de todo o mundo que chegaron ata os nosos días para que o público infantil medre coa fantasía dese mundo máxico que serviu aos nosos antigos para buscar explicacións ao descoñecido.

A cita será o venres 13 ás 18:50 h. na Biblioteca Antón Castro, no Centro Sociocultural de Meicende (Arteixo).

"Miña casiña, meu lar" chega a San Sadurniño para celebrar o Día Internacional da Muller

Para celebrar o Dia Internacional da Muller, Ana Hermida representará esta obra enfocada dende un punto de vista humorístico que amosa a realidade da muller no seu fogar e que reflicte a crúa situación das mulleres maltratadas, tanto no físico coma no verbal e no psíquico. Porque como apunta o Secretario da ONU,  Ban Ki-moon, na mensaxe deste ano, no Día Internacional da Muller:

"Neste Día Internacional da Muller, debemos recoñecer que os logros foron demasiado lentos e dispares, e que debemos facer moito máis por acelerar os progresos en todas as zonas do mundo. O mundo debe unir as súas forzas para responder aos ataques contra mulleres e nenas por parte dos extremistas violentos. As mulleres foron atacadas por intentar exercer o seu dereito á educación e aos servizos básicos; foron violadas e convertidas en escravas sexuais; foron dadas como trofeo aos combatentes, ou intercambiadas como mercadoría entre grupos extremistas en redes de trata. Médicas, enfermeiras e outras mulleres foron asasinadas por intentar exercer a súa profesión. Debemos adoptar unha postura internacional clara contra este asalto total aos dereitos humanos da muller..."

A cita será o 8 de marzo en Lamas, Concello de San Sadurniño, ás 16:30 h.

A Biblioteca Pública de Santiago Ánxel Casal, celebra o Día Mundial da Poesía "Rimando e Xogando"

Adiantámonos ao Día Mundial da Poesía para celebralo coas nenas e nenos de Compostela con pequenos xogos poéticos e rimas cheas de entretemento. A infancia é unha época ideal para comezar a coñecer a poesía e como Irina Bokova, Secretaria Xeral da UNESCO, di na mensaxe deste ano para celebrar este día:

"A poesía, tan antiga como a propia humanidade e igual de diversa, ten as súas raíces en tradicións, orais e escritas, tan variadas como o rostro humano, que capta a profundidade das emocións, os pensamentos e os anhelos que guían cada muller e cada home. A poesía é a expresión suprema da diferenza no diálogo e no espírito de unidade. Cada poema, aínda que único, reflicte o universal da experiencia humana, o anhelo de creatividade que transcende todos os límites e as fronteiras, tanto do tempo como do espazo, na afirmación constante de que a humanidade forma unha única e soa familia…"

Será o sábado 7 de marzo, ás 12:00 h. no Salón de Actos da Biblioteca.

Valdoviño celebra o Día Internacional da Muller "Contando en feminino"

Contaremos contos dende a perspectiva de xénero e igualdade, porque como di o Secretario da ONU,  Ban Ki-moon, na mensaxe deste ano, no Día Internacional da Muller:

"Mesmo nas sociedades que viven en paz, son demasiadas as nenas e as mulleres que seguen sufrindo malos tratos no fogar, mutilación xenital e outras formas de violencia que as traumatizan como individuos e danan sociedades enteiras. A discriminación segue sendo unha espesa barreira que ha de romper. Debemos ampliar as oportunidades na política, a empresa e noutros ámbitos. Debemos cambiar as mentalidades, especialmente entre os homes, inspirándoos a que se convertan eles mesmos en axentes activos do cambio. E debemos avalar a nosa determinación con recursos baseándonos no entendemento seguro de que os investimentos en igualdade entre os xéneros xeran progreso económico, inclusión política e social e outros beneficios que, á súa vez, fomentan a estabilidade e promoven a dignidade humana..."

A cita cos contos, actividade que organiza a Biblioteca Municipal, será o venres 6 de marzo, ás 18:30 h., na Casa da Cultura de Valdoviño.

Para celebrar o Día Internacional da Muller, lembramos a Ana Hermida contando "A historia en Feminino"

Nesta semana, na que se celebra o Día Internacional da Muller o 8 de marzo, lembramos as historias dunha historia na que as mulleres son, aínda agora, inxustamente tratadas.

Ana Hermida fai unha homenaxe en Arteixo o Día de Rosalía á escritora, representando "Tecín soia a miña tea"

Quixera agradecer a calor, o respecto e o agarimo que percibín o día 24 de febreiro, Día de Rosalía, en Arteixo. Grazas a todas as persoas que se achegaron a escoitar a súa obra e demostrar que está viva nos corazóns de todas as persoas galegas de ben. Grazas.

Tecín soia a miña tea, no Día de Rosalía, recollida na AELG

A Asociación de Escritores en Lingua Galega (AELG) recolle na súa axenda cultural todas as actividades relacionadas co Día de Rosalía, entre a que se encontra "Tecín soia a miña tea" que Ana Hermida representa en Arteixo.

Deixamos enlace á páxina: ACTIVIDADES PROMOVIDAS POR DIVERSAS ENTIDADES NO DÍA DE ROSALÍA, 24 DE FEBREIRO

O Noticieiro Galego, recolle a actividade Tecín soia a miña tea, para celebrar o Día de Rosalía en Arteixo

Así recolle o Noticieiro Galego a visita de Rosalía de Castro á Arteixo, terra do seu marido Manuel Mugguía, para celebrar o Día de Rosalía.

Arteixo celebra o Día de Rosalía con "Tecín soia a miña tea"

O 24 de febreiro Rosalía de Castro visitará o concello de Arteixo onde naceu o seu marido Manuel Murguía. Celebraremos o Día de Rosalía con Ana Hermida, que achega a súa obra "Tecín soia a miña tea", para homenaxear á nai das nosas letras.

Serán dramatizacións de poemas de Rosalía de Castro. Este espectáculo pretende amosar unha Rosalía actual, como os temas que ela trata, tan vixentes hoxe en día. A relación cos homes, a defensa da muller, da súa terra... O desexo e ansias súas polo teatro " eu quería ser actriz e non me deixaron". Unha Rosalía, a veces divertida, outras reivindicativa, dura. Unha muller interpretando a outra muller. Poemas, peza teatral de Miguel Anxo Fernán-Vello e algunha canción da autoría de Baldomero Iglesias "Mero", para honrar a nai da nosa terra.

Será na Sala de Exposicións do Centro Cívico Cultural de Arteixo, ás 17:30 h.

Tecín soia a miña tea, homenaxe a Rosalía de Castro

A nosa particular homenaxe a Rosalía de Castro, con Ana Hermida.

O día que contamos en Pastoriza "A historia en Feminino"

As nenas e nenos da Escola de Educación Infantil de Barrionovo estaban con ansias de coñecer historias extraordinarias de mulleres marabillosas, historias da historia, curiosidades...

Así que cumprimos os seus desexos, contamos historias fascinantes, sorprendentes, experimentaron unhas cousas e descubriron outras. Ao final e tras un breve recordatorio, sorprendéronnos con cousas que quedaran xa sempre gardadas na súa memoria.

Estivemos Rimando e Xogando na biblioteca do CSC de Meicende

Foron poetas por un día, rimaron, xogaron, cantaron... as nenas e nenos de Meicende estaban con moitos desexos de ler e disfrutar coa poesía, estiveron moi participativos acompañados dos seus maiores, que tamén participaron das actividades.

Cando chegan os momentos dos poemas feitos cancións, cando participan co corpo enteiro ao son da música entre risas e bailes... é un momento precioso que quero compartir, polo que deixo foto da súa implicación na actividade.

Na Coruña tiveron Un Nadal cheo de contos

Foi na Biblioteca Pública da Coruña, Miguel González Garcés, un sábado de inverno no que as nenas e nenos chegaron coa ilusión posta nos ollos das persoas que agardan que os soños se fagan realidade.

Tamén, entre as persoas asistentes, houbo quen contou as súas historias de Nadal, unhas máis clásicas e outras máis... disparatadas. Grazas a unha nai coa que interactuamos, o público asistente tivo unha visión do Nadal moi divertida. Despedímonos cantando panxoliñas, das nosas... en galego.

Cando non se pode poñer foto dos menores (sempre que o fago é porque hai autorización), poño algo para ilustrar a actividade, nesta que vos deixo, conta a voz, a cara, as mans, o ton...

A AELG leva na súa axenda o noso Rimando e Xogando, en Meicende

A Asociación de Escritores en Lingua Galega "AELG", sempre coas escritoras e escritores galegos, leva na súa axenda o noso Rimando e Xogando, actividade para o público infantil na biblioteca do novo Centro Sociocultural de Meicende.

Deixamos o enlace á páxina MEICENDE: RIMANDO E XOGANDO, CON ANA HERMIDA

Meicende inaugura "Rimando e Xogando" a súa biblioteca do novo Centro Sociocultural

As nenas e nenos que se acheguen á biblioteca xogarán coas palabras, disfrutarán cos poemas, rimarán, cantarán... coñecerán autores da nosa terra, cantares de cego, cantigas populares, panxoliñas... entretemento, diversión, cultura e amor á poesía será o eixo condutor nunha tarde de festa, a da poesía, pensada especialmente para ese público infantil, sempre tan esixente.

Tamén achegaremos o Díaz Castro máis infantil, unha homenaxe ao autor chairego  neste ano no que se lle adica o Día das Letras Galegas.

Será o día da inauguración do Centro Sociocultural de Meicende (Arteixo), na nova biblioteca "Antón Castro", o luns 22, ás 17:00 h.

Un Nadal cheo de contos na Biblioteca Pública da Coruña Miguel González Garcés

Poremos nos zapatiños de todas as nenas e nenos, contos feitos de maxia e ilusión. Cantaremos panxoliñas e contaremos historias que falan do sentido destas datas e que ás veces son divertidas, outras sorprendentes… contos de árbores de Nadal, de bonecos de neve, de Reis, de cousas imaxinadas e que, seguramente, algún día serán realidade.

Será o sábado 13 na Sala Infantil da biblioteca, ás 12:00 h.

O Concello de Meaño pechou a programación en contra da violencia de xénero con Miña casiña, meu lar

A representación de Miña casiña, meu lar, pechou os actos que o Concello de Meaño ao longo de toda a semana tiña preparados relacionados co 25 de novembro. Foi no centro social de Dena, alí o público asistiu na tarde de domingo a ver enriba dun escenario a violencia contra a muller dentro do fogar, consentida, aceptada... ás veces nin percibida.

Entre risos e bromas eran testigos en primeira fila das atrocidades que se lle fan ás mulleres na vida cotiá, rían e ao mesmo tempo a empatía coa protagonista era tal que chegaban a dialogar con ela, darlle consellos ou asentir...

Marcharon co sorriso nos beizos, tamén coa reflexión sobre o que viran e mesmo comentaban e debatían... diso se trataba, era o obxectivo a cumprir.

O Voitre e a Pomba, teatro en San Sadurniño no Día contra a violencia de xénero

O Concello de San Sadurniño incluía O Voitre e a Pomba dentro da súa programación para o 25 de novembro. A representación tivo lugar na Casa da Cultura e asistiron as mozas e mozos dos últimos cursos de secundaria do CPI San Sadurniño.

O Voitre e a Pomba é unha obra dura, pensada así para concienciar ao público e ante a reacción do mesmo nos lugares onde se representa, semella que cumpre co seu obxectivo principal, polo que en San Sadurniño volveron ver a crúa realidade da violencia exercida cara a figura feminina en diversos ámbitos.

O alumnado viña de facer un acto simbólico no que plantaron medio cento de flores e plantas en lembranza das mulleres asasinadas e a continuación asistiron á entrega de premios do concurso de relatos que convoca cada ano a Concellería de Igualdade.

Contamos A historia en Feminino ao alumnado da EEI de Barrionovo, no Día contra a violencia de xénero

Ana Hermida chegou á escola para contar historias de mulleres que a historia non tratou nin trata como debera, para poñer en valor a figura feminina, darlle o seu sitio e achegar, nesta ocasión, ao alumnado de educación infantil que sempre é tan receptivo, a historia real, a historia onde as mulleres teñen un papel importantísimo.

O público escoitaba con moita atención, participaba das historias desas mulleres marabillosas, xogaron e ao remate ante as preguntas finais, todas as persoas alí presentes, fomos testigos de que nomes e historias contadas, formarán xa parte das súas vidas.

As vidas destas mulleres son tan marabillosas que o público infantil quedou cos ollos abertos ante o que descubriu nese día tan importante, o Día Internacional da Eliminación da Violencia contra a Muller, polo que ao remate de tantas historias e xogos, fixeron promesa de non consentir ningún tipo de maltrato e non maltratar... eu sempre creo na súa palabra.

Rianxo conmerora o Día contra a violencia de xénero con O Voitre e a Pomba

O alumnado do Ies Félix Muriel foi o público ao que ía dirixida a obra. Tratábase de concienciar nun tema tan duro como é a violencia de xénero, remexer conciencias, non deixar indiferente a ninguén.

O debate que tivo lugar ao final da representación entre o público asistente (mestres e alumnado) con Ana Hermida e Santiago Fernández, que foron as persoas encargadas de representar a obra, foi moi interesante e xurdiron temas moi importantes, no que a implicación do público e intercambio de opinións foi moi enriquecedora.

A reacción do público durante a representación e as súas palabras ao remate da mesma, foron proba de que, tal e como se pretendía, remexeu por dentro e fixo pensar e concienciar nesa lacra social e inxusta, como é a violencia de xénero.

Teatro contra a violencia de xénero no Concello de Meaño coa obra Miña casiña, meu lar

Miña casiña, meu lar está incluída dentro da programación que o Concello de Meaño ten preparada con motivo do Día Internacional da Eliminación da Violencia contra a Muller.

Enfocada dende un punto de vista humorístico, amosa a realidade da muller no seu fogar, reflicte a crúa realidade da situación das mulleres maltratadas, tanto no físico coma no verbal e no psíquico. A soidade dunha muller pechada todo o día na súa casa, a violenta relación á que a somete o seu marido e que ela acepta como normal, a dobre explotación da muller, tanto no traballo como no fogar...

A cita será no Centro Social de Dena, no Concello de Meaño, ás 18:00 h. e será para todos os públicos.

O Voitre e a Pomba, verbas contra a violencia feminina na Casa da Cultura de San Sadurniño

O Voitre e a Pomba está incluido dentro dos actos programados pola Concellería de Igualdade de San Sadurniño para concienciar sobre a violencia de xénero.

Con motivo do Día Internacional da Eliminación da Violencia contra a Muller, que terá lugar este martes 25 de novembro, o alumnado do CPI de San Sadurniño asistirá a un espectáculo dirixido por Santiago Fernández, onde poesía e teatro se dan cita para denunciar a violencia contra as mulleres, homenaxear ás que xa non están e apoiar ás que están sufrindo esta lacra social. Ana Hermida e Santiago Fernández subirán ao escenario para ofrecerlles un espectáculo que pretende remover o máis íntimo as conciencias.

A cita será o martes 25, ás 15:30 h. no Casa da Cultura do Concello.

A historia en Feminino chega á EEI de Barrionovo

Será un achegamento ao mundo infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, escritoras, músicas… todas teñen cabida nesta historia en feminino. 

A través de contos, curiosidades, diversión e xogos, tentamos facer visibles ás mulleres e que a infancia teña unha visión máis real da historia. 

A cita coas nenas e nenos, será o martes 25 ás 10:00 h. na biblioteca da Escola de Educación Infantil de Barrionovo, en Pastoriza, no concello de Arteixo.

O Voitre e a Pomba, verbas contra a violencia feminina no IES Félix Muriel de Rianxo

Con motivo do Día Internacional da Eliminación da Violencia contra a Muller, que terá lugar este martes 25 de novembro, o alumnado do IES Félix Muriel asistirá a un espectáculo dirixido por Santiago Fernández, onde poesía e teatro se dan cita para denunciar a violencia contra as mulleres, homenaxear ás que xa non están e apoiar ás que están sufrindo esta lacra social. Ana Hermida e Santiago Fernández subirán ao escenario para ofrecerlles un espectáculo que pretende remover o máis íntimo as conciencias.

Será o luns 24 ás 16:30 h. no IES Félix Muriel de Rianxo.

O Rosal celebrou o Día da Biblioteca Contando en feminino

A alumnado do CRA María Zambrano achegouse á Biblioteca Pública do Concello de O Rosal para disfrutar da casa do saber e da palabra e escoitar contos de igualdade de xénero e non violencia.

Como era de esperar responderon debidamente, a súa curta idade non impide que todas as persoas que estaban participando das historias, teñan criterio para saber o que está ben ou mal. 

Quero agradecer ao público infantil a atención e colaboración nas historias, tamén o seu compromiso de non violencia e ao profesorado, o coidado, mimo, participación nos contos... dando exemplo e sempre educando en valores.

As nenas e nenos de Arteixo estiveron Rimando e Xogando na Biblioteca

A festa da poesía chegou a Arteixo e as nenas e nenos estaban alí para ler, rimar, xogar, cantar, brincar... sen o público infantil sería imposible a actividade, é o verdadeiro protagonista, un público sempre disposto e participar.

Tivemos ocasión de velo en Arteixo, tamén ver como se implican os maiores, un pai que le no atril a súa poesía ao igual que o público infantil, unha nai que canta... dando exemplo e inculcando o amor pola lectura. 

A biblioteca encheuse de poetas de curta idade que interpretaron o seu poema e que ao final recibiron un aplauso merecido de todo o público presente e anque algunha persoa, pola súa idade, aínda non sabía ler, non impediu que rimase, que disfrutase coa poesía das nosas autoras e autores galegos.

Contando en feminino na Biblioteca Pública Municipal de O Rosal, no blog de Ler conta moito

O blog de Ler conta moito, da Consellería de Educación e Cultura da Xunta de Galicia, faise eco da visita que realizou Ana Hermida á Biblioteca Pública Municipal de O Rosal, onde estivo "Contando en feminino" para as nenas e nenos do CRG María Zambrano.

Deixamos o enlace da actividade BPM O ROSAL-CONTANDO EN FEMININO-ANA HERMIDA

Rimando e Xogando con Ana Hermida, na axenda da AELG

A Asociación de Escritores en Lingua Galega "AELG", sempre coas escritoras e escritores galegos, publicita na súa páxina a homenaxe que lle rendemos a Díaz Castro. Estarán ademáis autoras e autores galegos, como Helena Villar Janeiro, Manuel María, Anisia Miranda, Xesús Rábade, Rosalía de Castro...

Será na Biblioteca Central de Arteixo "Henrique Rabuñal" e estará destinado ao público infantil. 

Deixamos o enlace á páxina ARTEIXO: RIMANDO E XOGANDO, POR ANA HERMIDA

Contando en feminino en Ler conta moito, na súa visita á Biblioteca "Ánxel Casal"

No blog de Ler conta moito recollen a actividade que realizou Ana Hermida "Contando en feminino" na biblioteca "Ánxel Casal". 

Deixamos aquí o enlace LISÍSTRATA, CONTANDO EN FEMININO NA BIBLIOTECA ÁNXEL CASAL

Rimando e Xogando con Díaz Castro, na Biblioteca Central de Arteixo "Henrique Rabuñal"

Esta semana achegarémonos a Arteixo para render homenaxe a Xosé María Díaz Castro, neste seu ano das Letras Galegas. 

O poeta chairego será obxecto de lecturas, xogos, rimas, cancións... unha maneira de achegar ao público infantil o seu traballo e a súa figura. Levamos o noso o Díaz Castro máis infantil, estará nas voces de Ana Hermida e das nenas e nenos de entre 4 e 11 anos que por alí se acheguen.

Serán pequenos xoguetes poéticos cheos de entretemento, versos que ás veces tamén son cantados, historias unhas, con actividades para nenas e nenos e outras nas que interactúan coa contadora. 

A cita coa poesía e con Díaz Castro, será o xoves 6 na Biblioteca Central de Arteixo "Henrique Rabuñal", ás 18:50 h.